ერთგულმა მაყურებლებმა უკვე დიდი ხანია იციან, რომ თითქმის ოცი წლის შემდეგ კიანუ რივზი და კერი-ენ მოსი კვლავ შეასრულებენ თავიანთ საკულტო როლებს — ნეო და ტრინიტი ეკრანებზე ბრუნდებიან!

ის ფაქტი, რომ მატრიცის ტრილოგიის გაგრძელებას ვიხილავთ, როგორც ჩანს, არა მხოლოდ ამ საკულტო ფილმების ერთგული გულშემატკივრებისთვის, არამედ თავად მსახიობებისთვისაც დაუჯერებელი სიახლე აღმოჩნდა: ამის შესახებ კიანუ რივზმა და კერი-ენ მოსმა ჟურნალ Empire-სთვის მიცემულ ინტერვიუში ისაუბრეს.

"როცა სცენარი წავიკითხე, ის იმდენად შეკრული, საოცრად ღრმა და ოსტატური ნამუშევარი იყო, რომ ვთქვი: "ეს ნამდვილი საჩუქარია". ამ ფაქტმა უბრალოდ ძალიან აღმაფრთოვანა", — განაცხადა კერი-ენ მოსმა.

კიანუ რივზი და კერი-ენ მოსი მატრიცის ერთადერთი კარგად ნაცნობი სახეები არ არიან, რომლებიც ამ ცნობილი ფრენჩაიზის ახალი ნაწილის შექმნაში მიიღებენ მონაწილეობას: The Matrix 4-ს წინა ფილმების თანარეჟისორი, ლანა ვაჩოვსკი იღებს. რაც შეეხება მის სცენარს, მასზე ვაჩოვსკისთან ერთად სერიალ Sense8-ის სცენარისტმა ალექსანდრ ჰემორმა და მსოფლიო ბესტსელერი წიგნის ღრუბლების ატლასის ავტორმა, დევიდ მიჩელმა იმუშავეს.

"ლანა ვაჩოვსკიმ ამ ფილმისთვის შთამბეჭდავი სცენარი შექმნა და მასში მოთხრობილმა მშვენიერმა ისტორიამ ჩემზე ძალიან იმოქმედა. სწორედ ესაა ერთადერთი მიზეზი, რის გამოც ამ როლს ისევ ვასრულებ. მასთან მუშაობა უბრალოდ საოცარია. მთელი ეს პროცესი განსაკუთრებულია და ფილმში მოთხრობილ ისტორიას კი, ვფიქრობ, ყველასთვის ძალიან მნიშვნელოვანი სათქმელი აქვს", — აღნიშნა კიანუ რივზმა ამ ახალ პროექტზე საუბრისას.

კიანუ რივზი, კერი-ენ მოსი და ლანა ვაჩოვსკი The Matrix 4-ის გადასაღებ მოედანზე.

ფოტო: NGRE / BACKGRID

ჯერჯერობით ახალი ნაწილის შესახებ ბევრი რამ ცნობილი არ არის, თუმცა სხვადასხვა ინფორმაციით, შესაძლოა, სიუჟეტურ ხაზში დროში მოგზაურობის ელემენტები იყოს გამოყენებული, რაც იმას ნიშნავს, რომ წინ ბევრი სიურპრიზი გველოდება.

სხვა ბევრი ჰოლივუდური პროექტის მსგავსად, პანდემიის გამო ვაჩოვსკის ამ გახმაურებული ფილმი გადაღებებიც დროებით შეჩერდა, თუმცა უახლოეს მომავალში გადასაღებ მოედანზე სამუშაოები წესით კვლავ აღდგება.

ფილმი პრემიერა 2021 წლის 21 მაისსაა დაგეგმილი.