"ფერადკანიანებს სისტემა გამუდმებით არ ითვალისწინებს" — ამ წარწერით და ახალი გრაფიტით გამოეხმაურა ცნობილმა მხატვარ ბენქსი ჯორჯ ფლოიდის მკვლელობასა და მიმდინარე საპროტესტო აქციებს.

ბენქსი წერს, რომ თავდაპირველად ფიქრობდა, უბრალოდ უნდა გაჩუმებულიყო და შავკანიანი ადამიანებისთვის მოესმინა ამ საკითხთან დაკავშირებით. "მაგრამ რატომ უნდა მოვიქცე ასე, ეს არაა მათი პრობლემა, ეს ჩემი პრობლემაა".

"ფერადკანიან ადამიანებს სისტემა გამუდმებით არ ითვალისწინებს. "თეთრი სისტემა", როგორც გაფუჭებული მილსადენი, რომელიც ქვემოთ მცხოვრებ ადამიანებს ტბორავს. გაუმართავი სისტემა ამ ადამიანების ცხოვრებას ტანჯვად აქცევს, მაგრამ ეს არაა მათი საქმე, რომ გამოასწორონ. მათ არ შეუძლიათ, რადგან არავინ მიუშვებთ ზედა სართულებზე", — წერს ბენქსი.

ახალ ნახატზე, რომელიც ბენქსიმ პოსტთან ერთად გამოაქვეყნა ჩანს როგორ იწვის კედელზე ჩამოკიდებული ამერიკის დროშა სოლიდარობის ნიშნად დანთებული სანთლის ალით.

რამდენიმე დღეა ამერიკასა და სხვა ქვეყნებში აქციები არ წყდება. დემონსტრაციები მინეაპოლისში პოლიციელის მხრიდან დაკავებისას ძალის გამოყენების დროს აფრო-ამერიკელი ჯორჯ ფლოიდის გარდაცვალებას მოჰყვა. გავრცელებულ ვიდეოებში ჩანს, რომ პოლიციელი დერეკ შოვინი 8 წუთის განმავლობაში ფლოიდს კისერზე ფეხს აჭერდა, დაკავებული ამბობდა, რომ ვერ სუნთქავდა. ექსპერტიზამ დაადასტურა, რომ ჯორჯ ფლოიდის გარდაცვალების მიზეზი ჟანგბადის ნაკლებობა გახდა.

აღნიშნული შემთხვევიდან მალევე დერეკ შოვინი და კიდევ სამი პოლიციელი სამსახურიდან გაათავისუფლეს. რამდენიმე დღეში კი შოვინი ფლოიდის მკვლელობის ბრალდებით დააკავეს.

მიუხედავად იმისა, რომ ამერიკის 40 ქალაქში კომენდანტის საათი გამოაცხადეს, დემონსტრანტები შეზღუდვას არ ითვალისწინებენ. ნიუ-იორკში, ჩოკაგოში, ფილადელფიასა და ლოს-ანჯელესში აქციის მონაწილეების წინააღმდეგ პოლიციამ ცრემლსადენი გაზი და წიწაკის ტყვიები გამოიყენა. რამდენიმე ქალაქში აქციის მონაწილეებმა პოლიციის მანქანები და მაღაზიები გადაწვეს.