აფხაზეთის უმაღლესი საბჭოს თავმჯდომარის, ჯემალ გამახარიას თქმით, ოკუპირებულ აფხაზეთში ზუსტად ვერ ადგენენ, ვის უდასტურდება და ვის არა კორონავირუსი. ამის შესახებ გამახარიამ მედიაჰოლდინგ კვირას პრესკლუბში გამართულ პრესკონფერენციაზე განაცხადა.

მისი თქმით, ამის მიზეზი ისაა, რომ ძალიან დაბალი კვალიფიკაციის სპეციალისტები ჰყავთ და შესაბამისი ტექნოლოგიები არ გააჩნიათ, რაც იქაურ მოსახლეობაში შეშფოთებასა და უნდობლობას იწვევს.

"დიდი ხნის განმავლობაში, თითქოს, ოკუპირებულ აფხაზეთში არ გამოვლენილა ინფიცირების შემთხვევები და იყო საუბრები, რომ აფხაზეთში კორონავირუსი არ არსებობს. მაგრამ შემდეგ აღმოჩნდა, რომ არსებობს. როგორც იქაური სპეციალისტები საუბრობენ, არანაკლებ არის გავრცელებული. დღეისათვის, მათი მონაცემებით, სულ 35 დაინფიცირებულია, აქედან 27 გამოჯანმრთელებულია, 1 კი გარდაცვლილი. გუშინ დაემატა 7 ადამიანი. მათ ტესტირება 56 თუ 57 ადამიანს ჩაუტარეს და იყო ინფორმაცია, რომ არავის დაუდასტურდა კორონავირუსი. საღამოსთვის აღმოჩნდა, რომ თურმე დაუდასტურდა 7 ადამიანს. ეს თითქოსდა უმნიშვნელო ფაქტი იმაზე მეტყველებს, რომ ისინი არ არინ კარგად მომზადებულები და ვერ ადგენენ ზუსტად, ვის უდასტურდება და ვის არ უდასტურდება ვირუსი. ეს 7 ადამიანი მიათვალეს იმათ, ვისაც არ დაუდასტურდა, მაგრამ აღმოჩნდა შემდეგ, რომ თურმე დაუდასტურდა", — განაცხადა გამახარიამ.

მისივე ინფორმაციით, ოკუპირებულ აფხაზეთში შეზღუდვები 15 ივნისამდეა დაწესებული და შემდეგ შესაძლოა, ტურისტები შემოვიდნენ. რამაც მისი თქმით, შესაძლოა, ძალიან სერიოზული ეპიდემიოლოგიური აფეთქება გამომიწვიოს. როგორც გამახარია ამბობს, აფხაზეთში 15 ივნისს და შეზღუდვების მოხსნას "დიდი შიშით" ელოდებიან.

"როგორც თავად წერენ და ამბობენ, აფხაზეთის სამედიცინო სისტემა ამას ვერანაირად გაუძლებს. თავად აღნიშნავენ, რომ ის ადამიანები, რომლებიც კარანტინში არიან, არ იცავენ კარანტინის წესებს. წარმოიდგენეთ, თავად ექიმებიც კი არ იცავენ დადგენილ წესებს. ალბათ, ეს იმითაა გამოწვეული, რომ მათ შესაბამისი ეკიპირება საკმარისი რაოდენობით არ აქვთ, თავად ექიმებიც კი სპეცეკიპირების გარეშე არიან და თავად შეიძლება, გახდნენ ამ ვირუსის გამავრცელებლები", — განაცხადა გამახარიამ.

რაც შეეხება საქართველოს მთავრობის დახმარებას, მისი თქმით, მათ საქართველოში არსებული საერთაშორისო ორგანიზაციების მეშვეობით სერიოზული დახმარება გაეწიათ, მაგრამ ეს არ არის საკმარისი იმისათვის, რომ აფხაზეთი ინფექციის აფეთქების შემთხვევაში მზად იყოს, რადგან ზუსტად არავინ იცის, რა ვითარებაა.

გამახარიას თქმით, კითხვის ნიშნებს იწვევს ის ფაქტიც, რომ ოკუპირებულ აფხაზეთს რუსეთთან საზღვრები ჩაკეტილი აქვს და მისი ინფორმაციით, მიუხედავად ამისა, რეგიონში რუსეთიდან 6 ათასი ადამიანი შევიდა.

"რაც შეეხება ადმინისტრაციულ საზღვარს ზუგდიდთან, ეს საზღვარიც ჩაკეტილია, მაგრამ მიუხედავად ამისა ავადმყოფები სპეციალური ნებართვით გადმოდიან როგორც აფხაზები, ასევე, ქართველები", — განაცხადა ჯემალ გამახარიამ.