დაავადებათა კონტროლის ეროვნული ცენტრის დირექტორის ინფორმაციით, თბილისში კორონავირუსით ინფიცირებული 9 ადამიანის წყარო შესაძლოა, სამედიცინო სფეროს წარმომადგენელი იყოს.

ამირან გამყრელიძე არ აზუსტებს, სად მუშაობს ეს ადამიანი, თუმცა აღნიშნავს, რომ ცხრავე ახალი შემთხვევა ერთი ოჯახიდანაა ან მათი ახლობლები არიან.

მისივე განმარტებით, ამ კლასტერში ამ დროისთვის 11 ადამიანია, რომელთაგან ვირუსი ორს 2 დღის წინ დაუდასტურდა. დანარჩენები მათთან კონტაქტში მყოფები არიან. ამასთან, გამყრელიძე აღნიშნავს, რომ ამ ეტაპზე ზუსტდება, ინფიცირების პირველწყარო არის სამედიცინო სფეროს წარმომადგენელი თუ სხვა ადამიანი.

"შესაძლოა, ეს არის ჩემი დიახ კოლეგა, სამედიცინო მუშაკი. ყველაზე დაზიანებული კლასტერი ყოველთვის გახლავთ სამედიცინო მუშაკები, მთელს მსოფლიოში კოვიდთან ბრძოლაში. საშუალო დაინფიცირების მაჩვენებელი 12-სა და 20%-ს შორის მერყეობს. საქართველოშიც, სამწუხაროდ, დაგვიინფიცირდნენ სამედიცინო მუშაკები, ციფრი არ იმალება, არის დაახლოებით 13%", — თქვა გამყრელიძემ.

მისივე ინფორმაციით, კლინიკაში, სადაც ინფიცირებული მუშაობდა, შესაბამისი ეპიდსაწინააღმდეგო ღონისძიებები მიმდინარეობს, თუმცა კარანტინის აუცილებლობა არ არის.