ინფექციური საავადმყოფოს დირექტორი, თენგიზ ცერცვაძე აცხადებს, რომ თბილისში ჯანმრთელ მოსახლეობაში 1 000 ადამიანიდან 6-ს COVID-19-ზე, იმუნოგლობულინ G-ს ანტისხეულები აღმოაჩნდა. მისივე თქმით, კვლევა თბილისის მოზრდილ მოსახლეობაში ჩატარდა და ჯერ დამთავრებული არაა.

როგორც ცერცვაძემ განმარტა, ტელეკომპანია კავკასიის ეთერში მან დაუშვა შეცდომა და თქვა, რომ წინასწარი მონაცემებით ანტისხეულები მოსახლეობის 6-10 პროცენტს აღმოაჩნდა, რეალურად საუბარი იყო 6-10 ადამიანზე.

"ჩვენ ამ კვლევაში ჩართული 1 000 კაციდან გვყავს 6-10 ადამიანი, თუ დავაზუსტებთ, გვყავს 6 ადამიანი, დანარჩენი 4-ის შედეგები ზუსტდება. კვლევა ჩავატარეთ თბილისის იმ მოსახლეობაში, რომელიც ავად არ ყოფილა. ამ 1 000 ადამიანიდან 6-ს აღმოაჩნდა COVID-19-ის ანტისხეულები. კვლევა ჩატარდა სწრაფი მარტივი ტესტით და არა PCR ტესტით. ეს არ ნიშნავს, რომ ეს 6 კაცი არის ავადმყოფი — მხოლოდ იმას ნიშნავს, რომ ისენი არიან სეროპოზიტიურები და მათ აქვთ ანტისხეულები. მსგავსი კვლევა მთელ მსოფლიოში ტარდება, რათა დაადგინონ რა შეფარდებაა ავადმყოფებისა და სეროპოზიტიური ადამიანების რაოდენობას შორის", — განმარტა ცერცვაძემ.

მისივე თქმით, მსგავსი კვლევები მთელ მსოფლიოში ტარდება. ამასთან, ცერცვაძე აღნიშნავს, რომ ახლა უნდა მოხდეს ამ მონაცემების ექსტრაპოლაცია, ანუ გადათვლა მთელ მოსახლეობაზე.