პარლამენტის ადამიანის უფლებათა დაცვის კომიტეტის თავმჯდომარე, სოფო კილაძე ამბობს, რომ თავად 20 ივნისის ღამეს დაშავებულ 23 პირს დაზარალებულის სტატუს მიანიჭებდა. ამ თემაზე კომენტარი მან TV პირველთან გააკეთა.

"ალბათ მე მათ ადგილზე მივანიჭებდი დაზარალებულის სტატუსს. თუმცა, თუ გაასაჩივრებს საია ამ შემთხვევაში ჩვენ გვაქვს წინ კონკრეტული პროცედურები და ამ პროცედურების მიხედვით იმედი მაქვს, რომ საბოლოო ჯამში სასამართლო სამართლიან გადაწყვეტილებას მიიღებს", — თქვა სოფო კილაძემ.

აღნიშნულ თემაზე დღეს განცხადება საქართველოს ახალგაზრდა იურისტთა ასოციაციამ გაავრცელა. მათი თქმით, პროკურატურამ 20 ივნისის მოვლენების შედეგად 23 დაზარალებულს დაზარალებულის სტატუსი ისევ არ მიანიჭა. როგორც ორგანიზაციაში აცხადებენ, პროკურატურის უარს სასამართლოში გაასაჩივრებენ.

20 ივნისის საქმეზე 2019 წელს საიამ ერთხელ უკვე მოითხოვა დაშავებული პირებისათვის დაზარალებულის სტატუსის მინიჭება, თუმცა, როგორც პროკურატურამ, ასევე სასამართლომ, მოთხოვნა არ დააკმაყოფილეს. როგორც არასამთავრობო ორგანიზაციაში განმარტავენ, პროკურატურა და სასამართლო დაზარალებულის სტატუსის მინიჭებაზე უარს ძირითადად იმით ხსნიდნენ, რომ სტატუსის მოთხოვნის დროისათვის დაზიანებებთან დაკავშირებით ექსპერტიზის შედეგები არ იყო ცნობილი. მოგვიანებით, აღნიშნულ პირთაგან პროკურატურამ დაზარალებულის სტატუსი მხოლოდ მაკო გომურს და გიორგი სულაშვილს მიანიჭა, თუმცა, სტატუსის მინიჭების მიუხედავად, როგორც მათ, ასევე საია-ს ადვოკატებს, საქმის მასალების სრულად გაცნობის შესაძლებლობა არ მიეცათ.

საიაში განმარტავენ, რომ აღნიშნულ უარს პროკურატურა ამჯერადაც ექსპერტიზის დასკვნის არარსებობაზე აფუძნებს და განმარტავს, რომ "ცალკე აღებული ჯანმრთელობის დაზიანების მიღების თუნდაც უდავო ფაქტი არ შეიძლება მივიჩნიოთ დაზარალებულად ცნობის ერთადერთ, იმპერიულ საფუძვლად ვინაიდან ამავდროულად უნდა დადგინდეს ზიანის გამომწვევი ქმედება წარმოადგენს თუ არა დანაშაულს".

საია იმედოვნებს, რომ სასამართლო დააკმაყოფილებს წარდგენილ საჩივარს და დაზარალებულ პირებს მიენიჭებათ დაზარალებულის სტატუსი. იმ შემთხვევაში, თუ საქმის გამოძიება დაზარალებულების სათანადო ჩართულობის და არსებითი ცვლილებების გარეშე გაგრძელდება, საია მათი ინტერესების დასაცავად ადამიანის უფლებათა ევროპულ სასამართლოს მიმართავს.