დღეს სტუდენტური თვითმმართველობის არჩევნები დაიწყო, აუდიტორია 115-მა კი მეორე დღეა აქციები განაახლა. სტუდენტებმა დაიკავეს მე–6 კორპუსი და ხელისუფლება დაპირების შეუსრულებლობაში დაადანაშაულეს.

"სტუდენტთა მოთხოვნები წამყვანმა პოლიტიკურმა ძალამ წინასაარჩევნო პროცესში წარმატებით გამოიყენა. მრავალი დაპირების მიუხედავად, თვითმმართველობის ეს მოდელი ისევ განაგრძობს არსებობას და სტუდენტური თვითმმართველობის არჩევნები ძველი მეთოდებით ტარდება" - აცხადებენ ისინი.

აუდიტორია 115 მოთხოვნებით მიმართავს პრემიერს, გიორგი კვირიკაშვილს, განათლების კომიტეტს, თსუ-ს რექტორს გიორგი შარვაშიძეს და პრეზიდენტს - გიორგი მარგველაშვილს.

საქართველოს პრემიერმინისტრისგან სტუდენტები აპრილში მიცემული დაპირების შესრულებას ითხოვენ, რომლის მიხედვითაც, კონსტიტუციაში უნდა განისაზღვროს განათლებისა და მეცნიერების დაფინანსების ქვედა ზღვარი, მინიმუმ 1%-ის ოდენობით, მთლიან შიდა პროდუქტთან შეფარდებით. მათი განცხადებით, პრემიერმა ასევე სისრულეში უნდა მოიყვანოს თვითმმართველობის რეფორმა:

"ამ რეფორმაზე დაპირება ჯერ კიდევ 2012 წლის წინასაარჩევნო პროგრამაში იყო. მიგვაჩნია, რომ სტუდენტური თვითმმართველობის ამ ფორმით შენარჩუნება წარმოადგენს ავტორიტარული რეჟიმის გადმონაშთს უნივერსიტეტში".

აუდიტორია 115 განათლების კომიტეტთან შეხვედრასაც ითხოვს მომდევნო ორი დღის განმავლობაში, რათა მათთან ერთად განიხილოს თვითმმართველობის რეფორმის პროექტი.

სტუდენტები ასევე სთხოვენ თბილისის სახელმწიფო უნივერსიტეტის რექტორ, საჯაროდ მხარი დაუჭიროს მათ მიერ გაჟღერებულ მოთხოვნებს:

"მოვუწოდებთ, რომ პოსტ-საბჭოთა საქართველოს ისტორიაში იყოს პირველი რექტორი, რომელიც დადგება არაპოლიტიკური პარტიებისა და მანკიერი სისტემის, არამედ სტუდენტების ლეგიტიმური მოთხოვნების მხარეს. ასევე, მოვითხოვთ, სასწრაფოდ გაიზარდოს სტუდენტური საცხოვრებლების რაოდენობა და დაიწყოს უკვე არსებული საცხოვრებლების რეაბილიტაცია".

საქართველოს პრეზიდენტ გიორგი მარგველაშვილისგან სტუდენტები მათი თქმით პროგრესული იდეების მხარდაჭერას ითხოვენ.

"აუცილებელია, ხელისუფლების საპარლამენტო და აღმასრულებელი შტოების მიერ უმოკლეს დროში მოქმედება! პრიორიტეტი მეცნიერებას! ყველა სტუდენტი თანასწორია!" - ამბობენ ისინი.