საქართველოს პარლამენტი დღეს მესამე მოსმენით განიხილავს ტყის კოდექსს, რომელიც საქართველოში მდებარე ეკლესია-მონასტებთან არსებული 20 ჰექტრამდე მიწის საპატრიარქოსთვის გადაცემას ითვალისწინებს.

დღესვეა დაგეგმილი საბოლოო კენჭისყრა, რომელმაც უნდა გადაწყვიტოს, შევა თუ ეს კანონი ძალაში.

ქართული ოცნების დეპუტატი, მიხეილ ყაველაშვილი, კენჭისყრამდე რამდენიმე საათით ადრე ამბობს, რომ ეს თემა არ იცის.

"სიმართლე გითხრათ, ეს თემა არ ვიცი. გავეცნობით სიღრმისეულად და მივიღებ გადაწყვეტილებას, დავუჭერ თუ არა მხარს. ჩემს კოლეგებთან გავივლი კონსულტაციას", — უთხრა ყაველაშვილმა ჟურნალისტებს.

იმ შემთხვევაში, თუ კანონპროექტს დეპუტატები მხარს დაუჭერენ, საქართველოს მართლმადიდებელი ეკლესიის საპატრიარქოს საკუთრებაში შეიძლება გადაეცეს საქართველოში არსებული ყველა ეკლესია-მონასტრის მიმდებარე ტყის ფართობი, არაუმეტეს 20 ჰექტრისა თითოეულის შემთხვევაში.

ტყის კოდექსის შესახებ არაერთი განცხადება გაავრცელეს არასამთავრობო ორგანიზაციებმა. ისინი ცვლილებების ამ ფორმით მიღებას ეწინააღმდეგებიან. ტოლერანტობის და მრავალფეროვნების ინსტიტუტის (TDI) განცხადებით, ინიციატივა დამატებით ქონებრივ და ფინანსურ პრივილეგიებს ანიჭებს დომინანტ რელიგიურ ორგანიზაციას, ასევე, არღვევს სახელმწიფოსა და რელიგიის ურთიერთგამიჯვნის კონსტიტუციურ პრინციპს.

TDI აღნიშნავს, რომ სახელმწიფოს მიერ საპატრიარქოსთვის გადაცემული ქონებისა და დაფინანსების მასშტაბი წინაასარჩევნო პერიოდებში იზრდება. მათივე შეფასებით, ეს ხელისუფლების მხრიდან გავლენიანი ინსტიტუტის მიერ პოლიტიკური მხარდაჭერის სურვილით შეიძლება აიხსნას.

კიდევ ერთი არასამთავრობო ორგანიზაციის, ადამიანის უფლებების სწავლებისა და მონიტორინგის ცენტრის (EMC) შეფასებით ცვლილებები ეწინააღმდეგება ფუნდამენტურ კონსტიტუციურ პრინციპებს და მათივე განცხადებით, იგი სტრატეგიული ბუნებრივი რესურსების მართვის და განაწილების უსამართლო პრაქტიკას ქმნის.

EMC-შიც ვარაუდობენ, რომ მართლმადიდებელი ეკლესიისთვის დამატებითი პრივილეგიების გადაცემის ამ ინიციატივას, სავარაუდოდ, წინასაარჩევნო კონტექსტში საპატრიარქოს ლოიალობის მოპოვების ინტერესი აქვს.