თბილისის პარლამენტში გამართულ სხდომაზე, სადაც მინისტრები კომიტეტების წარმომადგენლებს ხვდებოდნენ, ელენე ხოშტარიამ თეა წულუკიანს ჰკითხა, რას გულისხმობდა, როდესაც უწონებდა მოსამართლე თამაზ ურთმელიძეს რუსთავი 2-ის საქმეზე მიღებულ გადაწყვეტილებას:

"როდესაც კანდიდატები ისევ ამ შემადგენლობით ვიხილეთ, ჩვენ ილუზია არ გვქონია, რომ რეალურ პრობლემებზე ან გამოწვევებზე მოვისმენდით განცხადებებს, თუმცა თავს ვალდებულად ვთვლით დაგანახოთ ის რეალობა, რომელიც ამ კედლებს გარეთ ხდება.

პირველ რიგში ქალბატონ თეასთან მაქვს, შეკითხვა. ქალბატონო თეა, თქვენ გამოირჩეოდით ენთუზიაზმით, რუსთავი 2-ის წინააღმდეგ გამართულ რამდენიმე წლიან ბრძოლაში, ერთ-ერთ ყველაზე სამარცხვინო ეპიზოდში, როდესაც ურთმელიძემ მიიღო გადაწყვეტილება, რომელიც შეფასდა ჩვენი პარტნიორების, ამერიკისა და ევროკავშირის ერთობლივ განცხადებაში, ვციტირებ: როგორც მართლმსაჯულების დამოუკიდებლობისა და მედიის თავისუფლების სერიოზული კითხვების დასმით. თქვენ მოსამართლის ეს გადაწყვეტილება შეაფასეთ როგორც ნოვატორული და ურთმელიძეს მოუწონეთ ტესტის ჩაბარება.

ნამდვილად ჩააბარა ურთმელიძემ ტესტი, მაგრამ თქვენ ალბათ გეშლებათ, ტესტებს მოსამართლეები აბარებენ საზოგადოებისა და კანონის წინაშე და არა ბიძინა ივანიშვილის ან თქვენს წინაშე. ამიტომ იქნებ განმარტოთ, რას გულისხმობთ მის ნოვატორულ გადაწყვეტილებაში".

თეა წულუკიანის პასუხი

იუსტიციის მინისტრმა თეა წულუკიანმა თავის პასუხში ელენე ხოშტარიას უთხრა, რომ როდესაც ხოშტარია "პლეხანოვზე ძველბიჭობდა", თვითონ წიგნებს კითხულობდა:

"ძალიან მიჭირს სერიოზულად ვუპასუხო თქვენს კითხვებს, მაგრამ ასეთია ჩემი პასუხისმგებლობა და გიპასუხებთ. ქალბატონო ელენე, ნუ შემაწყვეტინებთ, მე არც ბავშვობაში, ძველბიჭობაში არ გეჯიბრებოდით, გახსოვთ ეს, მე წიგნს ვკითხულობდი, მე მახსოვხართ, არც ფეხბურთში გეჯიბრებოდით, ჩვენ ყოველთვის სხვადასხვა ადგილზე ვიყავით და ვართ. მე როცა წიგნს ვკითხულობდი, თქვენ პლეხანოვზე ძველბიჭობდით. ეს არ არის ჩემი სტილი.

ასევე გისამძიმრებთ, იმას, რომ სანდრო გვირგვლიანის მეგობარი ოთო კახიძის გვერდით ზიხართ. გისამძიმრებთ ამ იმედია დროებით მორალურ კრახს. კაცი რომელიც ვანოს [მერაბიშვილს] იცავს დღეს, იმის გვერდში ზიხართ დღეს.

ურთმელიძის გადაწყვეტილებას რაც შეეხება, რუსთავი 2-ის გარდა სხვა არხებსაც თუ მოუსმენთ, ეგებ უკეთ გაიგოთ რომელმა მინისტრმა რა თქვა. მე მაშინ ვთქვი, რომ სტრასბურგის ის გადაწყვეტილება მაინცდამაინც კარგად არ გამოიყურებოდა. ბოდიშიც მოვიხადე, რომ ვაფასებ სასამართლო გადაწყვეტილებას და ისიც ვთქვი, რომ მე რომ ვყოფილიყავი მოსამართლე, უკეთეს გადაწყვეტილებას დავწერდი მეთქი. სასამართლო გადაწყვეტილებების წერა ვიცი კარგად, 10 წელი ამას ვაკეთებდი სტრასბურგში.

აქედან გამომდინარე, არ ვიცი რა გიპასუხოთ, რუსთავი 2-ის ბედი არ მაინტერესებს, არც მისი მოწინააღმდეგე მხარის ბედი მაინტერესებს, სასამართლოშია ეს დავა და ყველამ თავის ადვოკატს და დაცვას და გაძლიერებას უნდა მიხედოს და მოსამართლე გადაწყვეტს, რა გადაწყვეტილება უნდა მიიღოს".

შეგახსენებთ, რომ რამდენიმე დღის წინ უზენაესი სასამართლოს კოლეგიამ რუსთავი 2-ის საქმე დიდ პალატას გადასცა.

ელენე ხოშტარიას "პასუხის პასუხი"

მოგვიანებით, ინგა გრიგოლიას გადაცემაში სტუმრობისას ელენე ხოშტარიამ შეაფასა თეა წულუკიანის რეპლიკა, სანდრო გირგვლიანთან და ირინა ენუქიძის ხსოვნის პატივისცემასთან დაკავშირებით, და იუსტიციის მინისტრის ამ სიტყვებს ამორალური უწოდა.

ხოშტარიას თქმით, თეა წულუკიანი სანდრო გირგვლიანის თემით სპეკულირებს, რაც თავად არასდროს გაუკეთებია:

"სანდრო გირგვლიანის თემა ჩემთვის იყო მართლაც ძალიან დიდი უსამართლობა და სწორედ ამიტომ ვაპროტესტებდი. დღეს თეა წულუკიანი პასუხისმგებელია ადამიანის ისეთ უფლებებზე, როგორიცაა მათ პირად ცხოვრებაში შეღწევა და ამის გამოქვეყნება. არცეთი გამოძიება დასრულებული არაა".

ნაციონალური მოძრაობის დეპუტატის თქმით, მისი პარტიის წევრებმა კრიტიკული კითხვები დასვეს, რასაც მინისტრთა კაბინეტიდან შეურაცხმყოფელი კომენტარებით უპასუხეს.