29 წლის ნესტან კვეკვესქირი თვითიზოლაციას სახლში, ქმართან და ორ პატარა შვილთან ერთად ატარებს და ამ დღეების განმავლობაში ახალი გატაცებაც აღმოაჩინა. ის თავისი ოჯახის ყოველდღიური ცხოვრების შესახებ პატარა ჩანახატებს აკეთებს და ამისთვის ჩვეულებრივ ფანქარს, ტუშის კალამსა და აკვარელის საღებავს იყენებს.

"იზოლაციის პერიოდში ყველაზე ხშირად თავს ხატვით ვირთობთ მე და ჩემი შვილი, რომელიც 5 წლისაა. ხშირად გვხატავს ოჯახის წევრებს და მეც ხშირად მთხოვდა, დამეხატა. ძირითადად იმ სიტუაციებს აღვწერ, რომელიც რეალურად ხდება ჩვენს სახლში", — ამბობს ის On.ge-სთან.

ნესტანს სტუდენტობისას ხატვის მხოლოდ საბაზისო კურსი აქვს გავლილი, განათლება კი საერთაშორისო ურთიერთობების მიმართულებით აქვს მიღებული და ამავე პროფილით მუშაობს. თუმცა, თანამედროვე ილუსტრაციებისა და მხატვრობის მოყვარულებს არ გაუჭირდებათ იმ განსაკუთრებული ტექნიკის შემჩნევა, რომელიც მის ნამუშევრებშია — მით უფრო დიდი ყურადღებით შექმნილ იმ მცირე დეტალებში, რომელსაც მთავარი გმირების ფონზე ვხედავთ და ნახატებს კიდევ უფრო დიდ ემოციას და პოზიტივს სძენს.

"ხატვა ყოველთვის მიყვარდა, თუმცა ამის დრო ძალიან იშვიათად მქონდა. ვფიქრობ, რომ მომავალში მისთვის დრო აუცილებლად უნდა გამოვნახო, რადგან ეს პროცესი ძალიან დიდ სიამოვნებას მანიჭებს", — ამბობს ნესტანი.

ის თავის ნამუშევრებს ჯერ მხოლოდ ფეისბუქზე აქვეყნებდა, თუმცა, მას შემდეგ, რაც მეგობრებისგან და ახლობლებისგან დიდი მოწონება დაიმსახურა, ინსტაგრამზე საჯარო პროფილიც შექმნა — nekustories, სწორედ აქ შეგიძლიათ მიადევნოთ თვალი მის ორიგინალურ ნამუშევრებს.

დილის რუტინა

ჭურჭლის რეცხვა

ბანაობა

ანდადასი

აივანი

ვახშამი

საღამო