პოლიტიკური პარტია გირჩის განცხადებით, 2020 წლის საპარლამენტო არჩევნებისთვის მათი საარჩევნო სია მხარდამჭერების ხმებით დაკომპლექტდება. პარტია გეგმავს შერჩევის ღია პროცესით გამოავლინოს კანდიდატები, თუმცა ჯერ არ აქვს გადაწყვეტილი, კონკრეტულად რა ფორმატით.

"სანამ საპარლამენტო სიაში მოხვდებიან პოლიტიკოსებმა თავი უნდა მოაწონონ გირჩის გულშემატკივრებს და დაიმსახურონ მათი მხარდაჭერა.

შესაბამისად, ახალი საინტერესო ადამიანების აღმოჩენის მიზნით უნდა ჩავატაროთ შერჩევის ღია პროცესი და მისი შედეგების მიხედვით უნდა დაკომპლექტდეს საპარლამენტო სია, რაც ამავდროულად, იქნება გირჩის საარჩევნო კამპანიის ნაწილიც", — წერია პარტიის განცხადებაში.

პარტიაში ამ ინიციატივას გირჩის გადატვირთვას უწოდებენ და მასზე პასუხისმგებელ პირად სანდრო რაქვიაშვილს ასახელებენ.

"ასეთი კამპანიის განხორციელებაზე და გირჩის გადატვირთვაზე პასუხისმგებელ ადამიანს სჭირდება განსაკუთრებული ლეგიტიმაცია და მხარდაჭერა მმართველი საბჭოს წევრებისგან და პოლიტიკოსებისგან", — აცხადებენ პარტიაში.

2020 წლის 8 მარტის შეთანხმების მიხედვით, არჩევნები 120/30-ზე ფორმატით უნდა ჩატარდეს, თუმცა ეს ინიციატივა ჯერ პარლამენტს არ დაუმტკიცებია.