საქართველოს საპატრიარქო გეგმავს ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეს თბილისის ქუჩები მანქანებიდან აკურთხოს და ხატებით შემოიაროს. ამის შესახებ ინფორმაცია არქიმანდრიტმა იოანე მჭედლიშვილმა TV პირველთან გააჟღერა. მისი თქმით, 17 მაისს მასშტაბური მსვლელობა პანდემიის გამო ვერ მოეწყობა.

"ხვალ იგეგმება ის, რომ რამოდენიმე მაქანა, ქალაქის მასშტაბით, სასულიერო პირებთან ერთად მოივლის და ნაკურთხ წყალს ასხურებს და ასე მიულოცავს ამ დღესასწაულს, ოჯახის სიწმინდის დაცვის დღეს. [..] იქნება წყლის სხურება და ხატებით შემოვლა", — თქვა იოანე მჭედლიშვილმა

On.ge-მ აღნიშნული ინფორმაცია საპატრიარქოს საზოგადოებასთან ურთიერთობის სამსახურის უფროსთან, ანდრია ჯაღამიძესთან გადაამოწმა, რომელმაც ფაქტი დაადასტურა.

ქვეყანაში საგანგებო მდგომარეობის გამო ყველა ტიპის შეკრება და მანიფესტაცია აკრძალულია. 17 მაისს მსოფლიოში ჰომოფობიასთან, ტრანსფობიასთან და ბიფობიასთან ბრძოლის საერთაშორისო დღეს აღინიშნება. ამ დღეს საქართველოს საპატრიარქო ოჯახის სიწმინდის დაცვის დღეს აღნიშნავს. ეკლესიამ ეს "დღესასწაული" მას შემდეგ დააწესა, რაც 2013 წლის 17 მაისს მრევლმა და სასულიერო პირებმა მშვიდობიანი მოქალაქეები ძალადობრივად დაარბიეს.