საქართველოს პარლამენტის ბოლნისის მაჟორიტარი დეპუტატი, გოგი მეშველიანი აცხადებს, რომ 15 მაისის დილის 6 საათიდან სოფელი გეტაც იზოლაციაში მოექცევა. ამის შესახებ ის ფეისბუქზე წერს. მეშველიანის ცნობითვე, დამატებით გატარდება შესაბამისი სამედიცინო ღონისძიებები.

დეპუტატის ინფორმაციით, ბოლნისის მუნიციპალიტეტის 48 დასახლებიდან, ამ დროისათვის, რთული ეპიდემიოლოგიური ვითარება რჩება ორ სოფელში მუშევანსა და გეტაში.

14 მაისს საღამოს ცნობილი გახდა, რომ ბოლნისის ორ სოფელში კორონავირუსის 15 ახალი შემთხვევა დადასტურდა. ბოლნისის მერის, დავით შერაზადიშვილის ცნობით, სოფელ მუშევანსა და სოფელ გეტაში სულ 131 ნიმუში გუშინ, 13 მაისს აიღეს, მათგან 8 გეტაში, 7 კი მუშევანში დადასტურდა. შედეგად, საქართველოში კორონავირუსის დადასტურებული შემთხვევების რიცხვი 667-მდე გაიზარდა. ინფიცირებულებს შორის გამოჯანმრთელებულია 383 ადამიანი, ხოლო გარდაცვლილია 12 პაციენტი.