მთავრობამ ბოლნისის მუნიციპალიტეტში შეზღუდვების გაგრძელების შესახებ დადგენილება მიიღო. დოკუმენტი 14 მაისით თარიღდება და ის 18 მაისიდან შევა ძალაში. აქამდე, დადგენილება მკაცრ საკარანტინე პირობებს მარნეულსა და ბოლნისში ითვალისწინებდა. მარნეულში 18 მაისიდან კარანტინი მოიხსნება.

ახალი დადგენილებით, ბოლნისის მუნიციპალიტეტის ტერიტორიაზე საგანგებო მდგომარეობის ვადით:

  • იკრძალება ყველა სახის მიმოსვლა;
  • ბოლნისის მუნიციპალიტეტის ტერიტორიაზე გადაადგილება. (ეს არ ეხება სამედიცინო მომსახურების მიღების მიზნით გადაადგილებას; სურსათისა და ფარმაცევტული პროდუქტების შეძენის მიზნით გადაადგილებას;)
  • ბოლნისის მუნიციპალიტეტის ტერიტორიაზე საზოგადოებრივი ტრანსპორტის გადაადგილება;
  • სატრანსპორტო საშუალებების შესვლა/გამოსვლა/გადაადგილება საქართველოს შინაგან საქმეთა სამინისტროს გადაწყვეტილებით განხორციელდება. (ეს არ ეხება სამედიცინო დაწესებულების საქმიანობას; სამედიცინო დანიშნულების საქონლის, ფარმაცევტული პროდუქტის რეალიზაციას;)

14 მაისს საღამოს ცნობილი გახდა, რომ ბოლნისის ორ სოფელში კორონავირუსის 15 ახალი შემთხვევა დადასტურდა. ბოლნისის მერის, დავით შერაზადიშვილის ცნობით, სოფელ მუშევანსა და სოფელ გეტაში სულ 131 ნიმუში გუშინ, 13 მაისს აიღეს, მათგან 8 გეტაში, 7 კი მუშევანში დადასტურდა. საქართველოში კორონავირუსის დადასტურებული შემთხვევების რიცხვი 667-მდე გაიზარდა. ინფიცირებულებს შორის გამოჯანმრთელებულია 383 ადამიანი, ხოლო გარდაცვლილია 12 პაციენტი.