დღეს, 13 მაისს ოპოზოციის საკონსულტაციო ფორმატის შეხვედრები განახლდა. პოლიტიკურმა პარტიებმა ერთიანი განცხადება გაავრცელეს და დაადასტურეს, რომ დაკავებული პოლიტიკოსების გათავისუფლების გარეშე კომპრომისი არ იქნება. ამ საკითხისგან განსხვავებით, მათ სხვადასხვა პოზიცია აქვთ იმაზე, დაიწყება თუ არა საპროტესტო აქციები პირობის შეუსრულებლობის შემთხვევაში.

"თუ საჭირო იქნება, რაღა თქმა უნდა, დავაპირებთ. ჩვენ ქვეყანას საჯიჯგნად ქართულ ოცნებას არ დავუთმობთ. წერტილი", — განაცხადა გიორგი ვაშაძემ შეხვედრის დასრულების შემდეგ.

აქციის აუცილებლობაზე ისაუბრა ლეიბორისტული პარტიის თავმჯდომარე შალვა ნათელაშვილმაც. მისი თქმით, კოლეგებს შესთავაზა, რომ გავრილოვის ღამის ერთი წლის თავზე აქცია გამართონ.

"20 ივნისს უნდა ჩატარდეს დისტანციის დაცვით, დიდი სახალხო თავყრილობა რუსთაველის პროსპექტზე, რათა კიდევ ერთხელ გავახსენოთ მთელს მსოფლიოს და რაც მთავარია, ამ ხელისუფლებას, რომ ჩვენ არ გვავიწყდება მათი სიავე, მათი ბოროტება და მათი ნამოქმედარი", — განაცხადა მან.

როგორც ნათელაშვილმა აღნიშნა, პოლიტიკოსებს ეს იდეა არ გაკვირვებიათ, რადგან ბევრი "იგივეს ფიქრობდა გულში". ლელო საქართველოს ლიდერმა, ბადრი ჯაფარიძემ კი აღნიშნა, რომ ამ თემაზე ჯერ არ უმსჯელიათ:

"ჯერ ასეთი შეთანხმება არა გვაქვს, როცა იქნება განხილვა, გეტყვით დამატებით".

ევროპული საქართველოს დეპუტატმა, დავით ბაქრაძემ განმარტა, რომ მსგავს გადაწყვეტილებას ეპიდემიოლოგიური სიტუაციის მიხედვით მიიღებენ და პოლიტიკური ამოცანებისთვის ადამიანების ჯანმრთელობას საფრთხეში არ ჩააგდებენ.

"ამ კონკრეტულ შემთხვევაში, სანამ ქვეყანაში არ არის ბოლომდე დასრულებული კორონავირუსის პანდემია; ჩვენი ამოსავალი წერტილი, შევუერთდებით, თუ არ შევუერთდებით, დავგეგმავთ, თუ არ დავგეგმავთ აქციებს, იქნება ქვეყანაში არსებული ეპიდემიოლოგიური მდგომარეობა, ხალხის ჯანმრთელობა", — აღნიშნა მან.

ნაწილობრივ შალვა ნათელაშვილის პოზიციას იზიარებს ნაციონალური მოძრაობის დეპუტატ თინა ბოკუჩავაც. მისი თქმით, არსებული სიტუაცია დისტანციურად აქციის ჩატარების საშუალებას იძლევა.

"რა თქმა უნდა, ჩვენ უნდა ვიმოქმედოთ გონივრულად, უნდა ვიმოქმედოთ ეპიდემიოლოგიური მდგომარეობიდან გამომდინარე, იმიტომ, რომ ადამიენების ჯანმრთელობა და სიცოცხლე არის უპირველესი ფასეულობა, რაც ყველა პოლიტიკურმა პარტიამ უნდა გაითავისოს გადაწყვეტილების მიღებისას. თუმცა, ამჟამინდელი ეპიდემიოლოგიური სიტუაცია ჩემი აზრით, გვაძლევს იმის შესაძლებლობას, რომ დავგეგმოთ სოციალური დისტანციის დაცვით საპროტესტო, სხვადასხვა ტიპის მოქმედებები", — განაცხადა ბოკუჩავამ.

8 მარტის შეთანხმება: ოპოზიცია VS მთავრობა

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან.

ოპოზიციის საპასუხოდ, პარლამენტის თავმჯდომარე აცხადებს, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. ქართული ოცნების წარმომადგენლები საუბრობენ იმაზეც, რომ ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

დისკუსიას გამოეხმაურნენ საელჩოებიც. მოლაპარაკებებში ჩართული დიპლომატების ერთობლივ განცხადებაში მითითებულია, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, "რაც სასამართლო სისტემაში პოლიტიკურ ჩარევას ჰგავს". საელჩოებმა მოუწოდეს ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს.

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.