ქართული ოცნების გენერალური მდივანი, ირაკლი კობახიძე ამბობს, რომ ოპოზიციას მოლაპარაკებების დროს პატიმრების საკითხს სვამდა, თუმცა მმართველი გუნდისგან ხისტ პასუხს იღებდა და ეს თავადაც არ გაუპროტესტებიათ.

მისი თქმით, როცა შეთანხმება ფორმდებოდა, ოპოზიციამ იმ დროსაც იცოდა მმართველი გუნდის მკაფიო პასუხი პატიმრების თემასთან დაკავშრებით.

"მოლაპარაკებების დროს ამ საკითხებს სვამდნენ ოპოზიციის წარმომადგენლები და თითოეულ შემთხვევაში მათ მიიღეს ძალიან მკაფიო და ხისტი პასუხი ამასთან დაკავშირებით, რაც მათ არ გაუპროტესტებათ თვითონ მოლაპარაკების პროცესში. როცა შეთანხმება ფორმდებოდა, იმ დროს მათ იცოდნენ ჩვენი მკაფიო პასუხი ამ საქმეებთან დაკავშირებით. ასე, რომ ყველაფერი დღესავით ნათელია. 3-ჯე და 4-ჯერ დასვეს მათ საკითხი და 4-ჯერ მიიღეს მკაფიო და ხისტი პასუხი ამასთან დაკავშირებით და ზუსტად ამ კონტექსტით მოეწერა ხელი შეთანხმებას", — განაცხადა კობახიძემ.

8 მარტს ოპოზიციასა და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.

"ჩვენ ვეთანხმებით საქართველოს მართლმსაჯულების სისტემაში უმაღლესი სტანდარტების დაცვისა და მათი დახვეწისკენ სწრაფვის მნიშვნელობას. მიუხედავად განსხვავებული აზრისა, ყველანი ვთანხმდებით, რომ აუცილებელია რეაგირება ქმედებებზე, რომლებიც შესაძლოა
აღქმულ იქნეს, როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იქნეს აცილებული.

მივესალმებით პრეზიდენტის წინადადებას, მისი საკონსტიტუციო უფლებამოსილების ფარგლებში, თავისუფალი, სამართლიანი და გამჭვირვალე საარჩევნო პროცესის ხელშეწყობასთან დაკავშირებით", — წერია განცხადებაში.