კორონავირუსის გამო თვითიზოლაციაში მყოფმა ვაშინგტონელმა "ყავისტმა" საყვარელი ცხელი სასმელის მისაღებად McDonald's-ში დრონი "აფრინა". ვიდეოში ის თავდაპირველად სწრაფი კვების ობიექტში რეკავს და არკვევს, დაკეტილები ხომ არ არიან პანდემიის გამო.

ამის შემდეგ, ის რესტორნის თანამშრომლებს აცნობებს, რომ დრონს უშვებს ყავის წამოსაღებად. ვიდეოში ხედავთ, რომ მაკდონალდსიდან ყავა გამოაქვთ, დრონზე ამაგრებენ, რომელსაც ის პატრონთან უსაფრთხოდ მიაქვს.

ვიდეო 22 მარტსაა გადაღებული. სიეტლი ერთ-ერთი პირველი ქალაქი იყო, რომელიც კორონავირუსის გავრცელების თავიდან არიდების მიზნით ჩაიკეტა. სხვა შტატებისგან განსხვავებით, ვაშინგტონში შეზღუდვები კვლავ ძალაშია. შტატში კორონავირუსის 15 462 შემთხვევაა გამოვლენილი, გარდაცვლილია 841 ადამიანი, გამოჯანმრთელებულთა რიცხვი უცნობია.