რუსეთში ბოლო 24 საათში კორონავირუსის 10 633 შემთხვევა დადასტურდა. როგორც BBC წერს, ეს ყველაზე დიდი მაჩვენებელია ქვეყანაში ეპიდემიის დაწყების შემდეგ. საერთო ჯამში რუსეთში ვირუსით ინფიცირებულთა რიცხვი 134 686-მდე გაიზარდა. ის მსოფლიოში ყველაზე მეტად "დაზიანებულ" ქვეყნებს შორის მეშვიდე ადგილს იკავებს.

ამასთან, ოფიციალური მონაცემებით, ვირუსით სიკვდილიანობის მაჩვენებელი ისევ დაბალია, სხვა ქვეყნებთან, აშშ-სთან, იტალიასთან და ესპანეთთან შედარებით. კვირას, 3 მაისს რუსეთში 58 პირი დაიღუპა, სულ კი 1 280 ვირუთ გარდაცვლილია აღრიცხული.

მანამდე, რუსეთის მშენებლობის მინისტრს, ვლადიმერ იაკუშევსა და მის მოადგილეს, დიმიტრი ვოლკოვს კორონავირუსი დაუდგინდათ. 30 აპრილს, ცნობილი გახდა, რომ კორონავირუსი რუსეთის პრემიერმინისტრს, მიხაილ მიშუსტინსაც დაუდასტურდა.