სილამაზის სალონების ფედერაცია ავრცელებს იმ რეკომენდაციებს, რომლებიც გახსნისთვის სილამაზის სალონებმა უნდა დაიცვან. მთავრობის ანტიკრიზისული გეგმის მიხედვით, სალონების გახსნა 8 ივნისისთვის იგეგმება.

როგორც ფედერაციის პრეზიდენტმა, თამუნა შარაშენიძემ On.ge-ს განუმარტა, წესები ჯანდაცვის სამინისტრომ შეიმუშავა. შარაშენიძე ამბობს, რომ სამინისტროს რეკომენდაციების დანართებში სალონები ნახსენები არ არის, თუმცა იგულისხმება.

რეკომენდაციები, რომელიც სალონებმა უნდა გაითვალისწინონ:

  • უნდა შეიძინონ უკონტაქტო თერმომეტრები, დამცავი ფარები, დეზობარიერები, ნიღბები და ხელთათმანები;
  • ყველა თანამშრომელი ვალდებულია, სამსახურში გამოცხადებისთანავე გაიზომოს სიცხე და აღრიცხვის ჟურნალში შეიტანოს მონაცემები;
  • კარებში უნდა იდგეს ერთი თანამშრომელი, რომელიც შემოსულ მომხმარებელს გაუზომავს სიცხეს, დააბანინებს ხელს/დეზინფექციას გაუკეთებს სადეზინფექციო ხსნარით, რომელიც იქვე გექნებათ მოთავსებული. აუცილებელია, ყოველი კლიენტის მონაცემები (ტემპერატურა) შეტანილი იქნას აღრიცხვის ჟურნალში;
  • ხელოსნებს შორის, ასევე მომხმარებლებს შორის მანძილი უნდა იყოს 2 მეტრი;
  • მომხმარებლებს უნდა ეკეთოთ ნიღბები და ხელთათმანები, ხოლო ხელოსნებს ფარები, ნიღბები და საჭიროების შემთხვევაში (მაგალითად, მანიკიური, კოსმეტოლოგი) ხელთათმანი;
  • ერთ სივრცეში მაქსიმუმ 5 ადამიანის ერთად ყოფნაა შესაძლებელი;
  • ვისაც გრძელი თმა აქვს (ხელოსნებს), უნდა დაიმაგრონ;
  • აკრძალულია მუშაობის პროცესში მობილური ტელეფონების გამოყენება;
  • დამლაგებელმა ხშირად უნდა გაწმინდოს იატაკი სადეზინფექციო ხსნარით, ხოლო სველი წერტილები, ყოველი მომხმარებლის შემდეგ;
  • სილამაზის სალონების მფლობელებმა აუცილებელია შეავსოთ სპეციალური ფორმა, სადაც უნდა მიუთითოთ სატრანსპორტო საშუალებები, რომლითაც თქვენი თანამშრომლები დადიან;
  • ადმინისტრატორებმა ყოველი საუბრის შემდეგ ტელეფონი სადეზინფიქციო ხსნარით უნდა გაწმინდონ.