თბილისის მერი, კახა კალაძე ელექტროსკუტერების გაზიარების სერვისის სიძვირეზე მოქალაქეებს იმით პასუხობს, რომ "ყველა ტრანსპორტს თავისი მომხმარებელი ჰყავს, გააჩნია ვისთვისაა ძვირი". ამის შესახებ მან დღეს, 28 აპრილს ჟურნალისტებს უპასუხა.

"გააჩნია ვისთვისაა [ძვირი] ვიღაცისთვის შეიძლება იყოს ძვირი, ვიღაცისთვის მისაღები. მე ამიტომ ვამბობ, რომ ყველა ტრანსპორტს თავისი მომხმარებელი ჰყავს. ვიღაცისთვის ტაქსი ძვირია და ის სარგებლობს საზოგადოებრივი ტრანსპორტით, მეტროთი და ავტობუსით. ვიღაცისთვის არაა ძვირი და გადაადგილდება ტაქსით. მომავალში ექნებათ ველოსიპედები. ადამიანებს ექნებათ არჩევანი", — ამბობს თბილისის მერი.

ჟურნალისტის კითხვაზე, ძვირია თუ არა, რომ ერთი საათით სკუტერით სარგებლობა 22 ლარამდე ღირს, კალაძე ამბობს, რომ ეს ტრანსპორტი მხოლოდ მოკლე მანძილზე გადაადგილებისთვისაა განკუთვნილი:

"ყველაფერი შედარებითია, თუ შევადარებთ ევროპულ ქვეყნებს, ექვსჯერ იაფია საქართველოში. არ ვიცი ადამიანმა 1 საათი სად უნდა მოიხმაროს სკუტერი. ხაშურში წასვლას თუ აპირებს, მე ამას არ ვურჩევ და ეს არაა მიზანშეწონილი. ეს არის მოკლე მანძილებზე გამოსაყენებელი, მაგალითად, ავტობუსის გაჩერებაზე ჩამოხვედი და გინდა, სახლამდე მიხვიდე".

27 აპრილიდან თბილისში ელექტროსკუტერების გაზიარების საპილოტე სერვისი ამოქმედდა. თბილისის მერიის ცნობით, ეკომეგობრული ტრანსპორტით სარგებლობისთვის შექმნილია სპეციალური აპლიკაცია (BIRD) და ვებგვერდი (www.scroll.eco), სადაც სკუტერის გამოყენების წესები და გადაადგილებისთვის აუცილებელი დეტალებია აღწერილი.

ელექტროსკუტერით პირველი მგზავრობისას ათი წუთი უფასოა. მომხმარებელი მის გააქტიურებას სპეციალური პრომო კოდის საშუალებით შეძლებს. მგზავრობის დაწყების ღირებულება 1 ლარია, ხოლო ყოველი მომდევნო წუთი 35 თეთრი ღირს. საპილოტე პროგრამის ფარგლებში 500 ერთეული სკუტერია, პროგრამით კი 1 000 ერთეულია გათვალისწინებული.