სხვადასხვა სტრიმინგ სერვისების გააქტიურებასთან ერთად HBO ცდილობს სატელევიზიო სივრცეში ერთ-ერთი ლიდერის სტატუსი არ დაკარგოს და თავის მომხმარებლებს კიდევ უფრო მრავალფეროვანი არჩევანი შესთავაზოს. მათ შორისაა Hellraiser-ის მიხედვით დაგეგმილი სერიალის გადაღება, რომელიც საკმაოდ ამბიციური პროექტი ჩანს.

Variety-ის ცნობით, ახალი სერიალი არ იქნება ამ ცნობილი ფილმების სერიის რიმეიქი, არამედ უფრო ისტორიის გაგრძელებას უნდა ველოდოთ: ნაცნობი სიუჟეტური დეტალებით განსხვავებულ ამბებს ვიხილავთ ეკრანებზე.

Hellraiser ცნობილი ფრენჩაიზია, რომლის ფარგლებშიც 35 წლის განმავლობაში ათი სხვადასხვა ფილმი გამოვიდა. პირველი ნაწილი კლაივ ბარკერის რეჟისორობით 1987 წელს იხილა მაყურებელმა და დიდი მოწონებაც დაიმსახურა. ამ ფილმების სერიას საფუძველი თავად კლაივ ბარკერის 1986 წელს გამოქვეყნებული რომანი The Hellbound Heart გახდა, რომელიც შემზარავი ისტორიის შესახებ მოგვითხრობს.

ამ ახალი სერიალის სცენარზე Godzilla: King of the Monsters-სა და Superman Returns-ის სცენარისტი, მაიკლ დოგერტი და ცნობილი საშინელებათა ჟანრის ფილმის Halloween პროდიუსერი დევიდ გორდონ გრინი იმუშავებენ.

HBO ბოლო პერიოდში მაყურებლებს ჟანრობრივად სულ უფრო მრავალფეროვან სანახაობას სთავაზობს და მათ შორის საშინელებათა ჟანრის მოყვარულებსაც: წელს შედგა სტივენ კინგის რომანის მიხედვით გადაღებული სერიალის პრემიერა The Outsider, რომელმაც კრიტიკოსების დადებითი შეფასებები დაიმსახურა. წლის ბოლომდე უნდა გამოვიდეს Lovecraft Country-ც, რომლის ხილვასაც მაყურებლები მოუთმენლად ელიან.