მთავარი არხის თანადამფუძნებელი, გიორგი რურუა პატიმრობაში რჩება. მისი ადვოკატის, დიმიტრი საძაგლიშვილი ამბობს, რომ სასამართლომ არ გაითვალისწინა ქვეყანაში არსებული ვითარება, რადგან რურუა ჯანმრთელობის მდგომარეობით რისკ-ჯგუფს წარმოადგენს.

"სასამართლოზე დაკითხულ პირთა ჩვენებებიდან აშკარად გამოვლინდა, მათ შორის პოლიციელების ჩვენებებიდან, რომ გიორგი რურუა უდანაშაულოა და პოლიტიკური პატიმარია და მხოლოდ იმიტომ იმყოფება ციხეში, რომ მთავარი არხის დამფუძნებელი და ანტისაოკუპაციო აქციების მხარდამჭერი", — ამბობს ადვოკატი მთავარ არხთან.

გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. პროკურატურის განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობა და მისი შესრულებისათვის ხელის შეშლა (სსკ 381 მუხლის პირველი ნაწილით გათვალისწინებული ქმედება).