ოკუპირებული აფხაზეთის დე ფაქტო მთავრობა გადადგა მას შემდეგ, რაც დე ფაქტო პრეზიდენტი ასლან ბჟანია უფლებამოსილების შესრულებას შეუდგა. ადგილობრივი სახელისუფლებო გამოცემის ინფორმაციით, ახალ დე ფაქტო პრემიერად ალექსანდრ ანქვაბი დაინიშნა.

გარდა ამისა, ყოფილი საპრეზიდენტო კანდიდატი ალხას კვიცინია ბჟანიას ადმინისტრაციის უფროსი გახდა. კვიცინია ის კანდიდატია, რომელმაც დე ფაქტო საპრეზიდენტო არჩევნების შედეგები გააპროტესტა. ის დარწმუნებული იყო, რომ ყოფილმა დე ფაქტო პრეზიდენტმა, რაულ ხაჯიმბამ არჩევნები გააყალბა და ხელახალ არჩევნებს მოითხოვდა.

დე ფაქტო უზენაესმა სასამართლომ კვიცინიას სარჩელი დააკმაყოფილა და დე ფაქტო არჩევნების შედეგები გააუქმა. მოგვიანებით, რაულ ხაჯიმბა გადადგა და ხელახალ არჩევნებში ასლან ბჟანიამ გაიმარჯვა.