ტომ ჰენკსმა ავსტრალიელ ბიჭს, რომელსაც კორონა ჰქვია, მეგობრული წერილი დაუწერა და საჩუქარი გაუგზავნა. მსახიობს თავდაპირველად 8 წლის ბიჭმა მისწერა და უთხრა, რომ სახელის გამო დასცინიან და "კორონავირუსს" ეძახიან:

"გავიგე, რომ შენ და შენს ცოლს კორონავირუსი დაგიდგინდათ, კარგად ხართ? მე კორონა მქვია და მიყვარს ეს სახელი, მაგრამ ახლა სკოლაში კორონავირუსს მეძახიან, რის გამოც ვბრაზდები და თან ვსევდიანდები".

საპასუხოდ ტომმა მას ყურადღებისთვის და მოკითხვისთვის მადლობა გადაუხადა:

"ძვირფასო მეგობარო კორონა, შენმა წერილმა მე და რიტა ძალიან გაგვახარა. მადლობა, რომ ასეთი კარგი მეგობარი ხარ, მეგობრები ერთმანეთს ხომ რთულ სიტუაციებში გვერდით უდგანან. შენ ერთადერთი ადამიანი ხარ, ვისაც ვიცნობ და კორონა ჰქვია, როგორც გვირგვინი და წრე მზის გარშემო".

მან ბიჭუნას საჩუქრად საჩუქრად კორონას ბრენდის საბეჭდი მანქანა გაუგზავნა, რომელსაც კარანტინის დროს თავად იყენებდა.

"ჰკითხე უფროსებს, როგორ უნდა მისი გამოყენება და შემდეგ მასზე დაწერილი წერილი დამიბრუნე".

როგორც ბიჭუნას ოჯახი ამბობს, 8 წლის კორონა ძალიან ბედნიერია, რომ ამერიკაში მეგობარი შეიძინა. მან ტომ ჰენკსი ადრესატად Toy Story-ში შესრულებული ვუდის როლის გამო აირჩია.

"PS! You got a friend in ME! (ჩემი სახით მეგობარი გყავს)" — ამ ხელნაწერით დაასრულა ტომმა წერილი.

ჰენკსსა და მის ცოლს, რიტა ვილსონს კორონავირუსი გასულ თვეს, ავსტრალიაში ყოფნისას დაუდასტურდათ. ისინი განიკურნენ და ამერიკაში დაბრუნდნენ.