ყველა შეზღუდვის მიზანია დავიცვათ მოქალაქეების სიცოცხლე — მთავრობა მანქანების გადაადგილებაზე

მანქანების გადაადგილების შეზღუდვასთან დაკავშირებით მთავრობა განმარტებას აკეთებს. პრემიერმინისტრის პრესსპიკერის თქმით, შეზღუდვა 27 აპრილის ბოლომდე გაგრძელდება.

ირაკლი ჩიქოვანი აღნიშნავს, რომ ხელუსუფლების მიერ გატარებული ყველა ღონისძიება ზიანის მაქსიმალურად შემცირებას ემსახურება.

"ყველა რეგულაციის, ყველა შეზღუდვის მიზანია, დავიცვათ ჩვენი თითოეული მოქალაქის სიცოცხლე, მაქსიმალურად შევაფერხოთ Covit-19-ის გავრცელება და მივცეთ ჩვენს მართლაც რომ გმირ ექიმებს იმის საშუალება, რომ ყველა ჩვენი თანამოქალაქისთვის უზრუნველყონ მაღალი ხარისხის მომსახურება და შეძლონ მათი სიცოცხლისთვის ბრძოლა", — თქვა ჩიქოვანმა.

დღეს ცნობილი გახდა, რომ მანქანებით გადაადგილება Glovo-სა და Wolt-ის კურიერებსაც შეეზღუდათ.

გუშინ, 21 აპრილს პრემიერმინისტრის პრესსპიკერმა თქვა, რომ 27 აპრილიდან დაიწყება შეზღუდვების მოხსნა, მათ შორის, გადაადგილების შეზღუდვის. თუმცა, საგანგებო მდგომარეობა საქართველოში 22 მაისამდე გაგრძელდება.