შინაგან საქმეთა სამინისტროს თანამშრომელს, რომლის უმისამართოდ ნასროლი იარაღით ქალი გარდაიცვალა, ბრალი დაუმძიმდა. ახალი მუხლი სასჯელის სახით 7-დან 15 წლამდე ვადით თავისუფლების აღკვეთას ითვალისწინებს.

ინფორმაციას ამის შესახებ პროკურატურა ავრცელებს. მათი თქმით, შსს-ს თანამშრომელს ბრალი არაპირდაპირი განზრახვით მკვლელობის მუხლით წარედგინა.

"2020 წლის 19 აპრილს, ს.გ. იმყოფებოდა თავის საცხოვრებელ ბინაში, დაახლოებით 21:00 საათზე, ალკოჰოლური სიმთვრალის მდგომარეობაში მყოფი ს.გ. გავიდა საცხოვრებელი ბინის აივანზე და როდესაც ქვეყანაში გამოცხადებული იყო საგანგებო მდგომარეობა და მოსახლეობის აბსოლუტური უმრავლესობა იმყოფებოდა საცხოვრებელ სახლებში, თავისი კუთვნილი "ვიკინგ"-ის მოდელის ცეცხლსასროლი იარაღიდან განახორციელა რამოდენიმე გასროლა საცხოვრებელი კორპუსების მიმართულებით. შედეგად, ს გ.-ის მიერ ცეცხლსასროლი იარაღიდან გასროლილი ერთ-ერთი ტყვია თავის არეში მოხვდა საკუთარ საცხოვრებელ ბინაში მყოფ- თ.ა.-ს, რომელიც მიღებული ცეცხლნასროლი ჭრილობის შედეგად გარდაიცვალა", — აღნიშნავენ პროკურატურაში.

მათივე ცნობით, საქმეზე ათეულობით საგამოძიებო და საპროცესო მოქმედება ჩატარდა, მათ შორის, მოწმეების გამოკითხვა, შემთხვევის ადგილის დათვალიერება, ბრალდებულის საცხოვრებელი ბინის ჩხრეკა.

უწყებაში ამბობენ, რომ შსს-ს თანამშრომლის სახლიდან გასრილილი ტყვიის 13 მასრა და "ვიკინგის" ტიპის ცეცხლსასროლი იარაღი ამოიღეს.

მათივე ცნობით, სროლის მანძილზე დანიშნულია ექსპერტიზა და ნიმუშებიც ექსპერტებმა აიღეს.

პროკურატურაში აღნიშნავენ, რომ სროლის მომენტში შსს-ს თანამშრომელი ბინაში მარტო იყო.

"მასთან სტუმრად მყოფმა პირებმა ს.გ.-ს ბინა დატოვეს სროლის განხორციელებამდე რამოდენიმე ხნით ადრე, რაც დაადასტურეს მოწმის სახით გამოკითხვისას როგორც თავად აღნიშნულმა სამმა პირმა, ასევე საცხოვრებელი კორპუსის დატოვების ფაქტი ასახულია კორპუსზე დამონტაჟებული სათვალთვალო კამერით", — აღნიშნულია უწყების მიერ გავრცელებულ განცხადებაში.

მათივე ინფორმაციით, ბრალდებულისთვის აღკვეთის ღონისძიების სახით პატიმრობის შეფარდების მოთხოვნით სასამართლოს დადგენილ ვადაში მიმართავენ.

უწყებაში აღნიშნავენ, რომ შსს-ს თანამშრომელს ბრალი საქართველოს სისხლის სამართლის კოდექსის 108-ე მუხლით წარედგინა.