მართლმადიდებელ მშობელთა კავშირის ლიდერი, რომელიც ჰომოფობიური, ქსენოფობიური, ძალადობრივი აქციების ორგანიზატორია, კანონს არღვევს.

დეკანოზი დავით ისაკაძე მრევლთან ერთად ქუჩაში დისტანციის დაცვის გარეშე გადაადგილდება.

ხანგრძლივი მსვლელობა, სავარაუდოდ, 19 აპრილის გამთენიისას გაიმართა. კადრებში 20-ზე მეტი ადამიანი ჩანს, მათ შორის არიან ბავშვებიც.

დისტანციის დაცვის გარეშე ათეულობით ადამიანის ქუჩაში გადაადგილების ვიდეო მრევლმა გაავრცელა.

On.ge კითხვით — იციან თუ არა კანონდარღვევის შესახებ და ექნებათ თუ არა რეაგირება — შინაგან საქმეთა სამინისტროს დაუკავშირდა. მათ პასუხს მიღებისთანავე შემოგთავაზებთ.

საქართველოში საგანგებო მდგომარეობა მოქმედებს, რომლის მიხედვით, აკრძალულია შეკრებები და მანიფესტაციები, ასევე, ერთდროულად სამზე მეტი ადამიანის შეკრება. აუცილებელია დისტანციის დაცვაც. შეზღუდულია ავტომობილებით გადაადგილებაც, თუმცა მთავრობამ საპატრიარქოს ამ წესის დარღვევის უფლება მისცა, ისევე, როგორც ეკლესიებში კომენდანტის საათის დროს დისტანციის დაცვით შეკრების. თუმცა, ქუჩაში მსვლელობის უფლება ეკლესიისთვის ოფიციალურად არ მიუციათ.

კორონავირუსის პანდემიის პირობებში, სპეციალისტების რეკომენდაციების მიუხედავად, საპატრიარქომ უარი თქვა მთავარი რეკომენდაციის შესრულებაზე და მრევლს სახლში დარჩენისკენ არ მოუწოდა. გუშინ, 18 აპრილს დიდ ეკლესიებში წირვა-ლოცვა ფაქტობრივად უცლელად ჩატარდა. მრევლი ტერიტორიაზე 21:00 საათამდე მივიდა და არსებული ინფორმაციით, 06:00 საათამდე დარჩა.

ამ დროისთვის საქართველოში კორონავირუსის 394 დადასტურებული შემთხვევაა, მათ შორის გამოჯანმრთელდა 93, ხოლო გარდაიცვალა 4 ადამიანი. კარანტინის რეჟიმში იმყოფება 5094 პირი, სტაციონარში მეთვალყურეობის ქვეშ კი — 547.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: