ილიას სახელმწიფო უნივერსიტეტის სამართლის სკოლის ყოფილი დეკანი, პროფესორი გიორგი თუმანიშვილი ფეისბუკის საკუთარ გვერდზე წერს, რომ პირველი ინსტანციის სასამართლომ სრულად დააკმაყოფილა მისი სასარჩელო მოთხოვნა, კერძოდ კი გააუქმა ილიას სახელმწიფო უნივერსიტეტის მიერ გამოცემული გადაწყვეტილება. მისივე თქმით, სასამართლომ მიიღო გადაწყვეტილება დაკავებულ თანამდებობაზე მისი აღდგენის შესახებ და უნივერსიტეტს დააკისრა განაცდურის ანაზღაურება.

გიორგი თუმანიშვილი On.ge-სთან საუბარში ამბობს, რომ იგი კონტრაქტის ვადის გასვლამდე, 44 თვით ადრე გაათავისუფლეს.

უნივერსიტეტის ბრძანების თანახმად, მისი აკადემიური თანამდებობიდან გათავისუფლების საფუძველი გახდა დისციპლინარული საქმის წარმოების დადგენილი ფაქტები, მათ შორის აკადემიური პერსონალისა და სწავლების პროცესში მონაწილე სხვა პირების მიმართ ეთიკის კოდექსის მოთხოვნების დარღვევა. ბრძანებაში ასევე საუბარია 2014 წლის 30 აპრილს გამოქვეყნებული ღია წერილის შესახებაც.

გიორგი თუმანიშვილი თანამდებობიდან 2014 წლის აგვისტოში გაათავისუფლეს. მისი აზრით, იგი იმ ღია წერილის გამო გაუშვეს, რომელიც სამართლის სკოლის სტუდენტთა ინტერესების დაცვის მიზნით სოციალურ ქსელში გაავრცელა.

წერილით მან გიგა ზედანიას, რომელიც ილიაუნის რექტორად 2014 წლის თებერვალში დაინიშნა, სტუდენტთა სტიპენდიების წესის შეცვლის საკითხზე მიმართა. წერილში ნათქვამია, რომ სტიპენდიების გაცემის წესის შესახებ რექტორ გიგა ზედანიას ბრძანება შინაარსობრივად უსამართლოა და ხელყოფს სამართლის სკოლის სტუდენტთა შესაძლებლობას, მონაწილეობა მიიღონ თანასწორუფლებიან, თანაბარ შეჯიბრებითობაში.