ვერის ეკლესიას, რომლის ერთ-ერთ მღვდელმსახურს კორონავირუსი დაუდასტურდა, ახლა დეზინფექციას უტარებენ. TV პირველის მიერ გავრცელებულ კადრებში ჩანს, რომ ეკლესიის ეზოსა და შიდა სივრცეს სპეციალურად აღჭურვილი გუნდი ხსნარით ამუშავებს.

დღეს, 14 აპრილს ბოჭორიშვილის კლინიკაში დაადასტურეს, რომ სასულიერო პირს კორონავირუსი დაუდასტურდა. კლინიკის სამეთვალყურეო საბჭოს თავმჯდომარე მაია სოლოღაშვილი ამბობს, რომ მღვდელი მათთან გუშინ, 13 აპრილს შეიყვანეს. დაინფიცირების წყარო ამ დროისთვის უცნობია.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

ბოლო მონაცემებით, საქართველოში კორონავირუსით ინფიცირებულია 296 ადამიანი, მათგან გამოჯანმრთელებულია 68, ხოლო გარდაცვლილი — 3. კარანტინის რეჟიმში 4 834 ადამიანი იმყოფება, სტაციონარში მეთვალყურეობის ქვეშ კი 434.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: