კიევ-პეჩერის ლავრაში კარანტინი გამოცხადდა, რის გამოც მონასტერი იკეტება. ამის შესახებ კიევის მერმა, ვიტალი კლიჩკომ განაცხადა. ტაძარში კორონავირუსის უკვე დადასტურებული 90 შემთხვევაა.

კლიჩკოს ინფორმაციით, ბოლო 24 საათში კიევში კორონავირუსის 79 შემთხვევა გამოვლინდა და აქედან 63 კიევ-პეჩერის ლავრაში.

Unian-ის ინფორმაციით, კიევ-პეჩერის ლავრაში ღვთისმსახურებას უკრაინის მართლმადიდებელი ეკლესიის მოსკოვის საპატრიარქო აღავლენს. ისინი კი მრევლს მოუწოდებდნენ, რომ კარანტინისა და კორონავირუსის საშიშროების მიუხედავად ტაძარში მისულიყვნენ.

ამასთან, ბზობის დღესასწაულზე მრევლის შეკრების გამო სასულიერო პირები დააჯარიმეს. უკრაინის შინაგან საქმეთა მინისტრი ამბობს, რომ უპასუხისმგებლობასა და ადამიანის ჯანმრთელობის უპატივცემულობას არაფერი აქვს საერთო ღმერთთან.

ეპიდემიის დაწყების დღიდან უკრაინაში სულ კორონავირუსის 3 102 შემთხვევა გამოვლინდა, 93 ადამიანი კი ვირუსის შედეგად გარდაიცვალა. პანდემიის გამო უკრაინაში საგანგებო მდგომარეობაა გამოცხადებული და სხვადასხვა შეზღუდვაა დაწესებული. უკრაინის ავტოკეფალური ეკლესიის სინოდის გადაწყვეტილებით, ეკლესია ღვთის,ახურებას მრევლის გარეშე უნდა ატარებდეს.