ნაციონალური მოძრაობის ლიდერი, ნიკა მელია ირაკლი ოქრუაშვილის განაჩენის შეფასებისას აღნიშნავს, რომ მომდევნო ხელისუფლების პირობებში, "ყურმოჭრილი ამფსონი", მოსამართლის სახით, უნდა გასამართლდეს. TV პირველის ეთერში საუბრისას მელია ამბობს, რომ ოქრუაშვილის წინააღმდეგ მტკიცებულებები არ არსებობდა და ისე გამოიტანეს განაჩენი:

"ხელისუფლებას მოუწევს პოლიტიკური ფასის გადახდა არამხოლოდ ირაკლი ოქრუაშვილის საქმისათვის. [...] ეს მასამართლე გასასამართლებელია. სანამ რამდენიმე ასეთი ყურმოჭრილი ამფსონი ნებისმიერი ხელისუფლების, არ გასამართლდება, ყოველთვის ექნება, ყველა მომდევნო ხელისუფლების პირობებში ცდუნება, მოსამართლეს, რომ დაემორჩილოს აღმასრულებელ ხელისუფლებას. ბატონმა ლავრენტიმ [მაღლაკელიძემ] ჩვეულებრივად უნდა იაროს საქართველოს ველ-მინდვრებში და ქუჩებში, მას შემდეგ, რაც ხელისუფლება შეიცვლება და პასუხი არავინ მოთხოვოს?"

დღეს, 13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. ამავე საქმეზეა ბრალდებული ოპოზიციონერი ნიკა მელიაც. მას აღკვეთი ღონისძიების სახით გირაო აქვს შეფარდებული.