საერთაშორისო გამჭვირვალობა — საქართველოს ინფორმაციით, ქალაქ ახალციხის საკრებულოში ფრაქცია ქართული ოცნების ყოფილმა თავმჯდომარემ, მამუკა მიქელაძემ ბენზინგასამართი სადგურის მშენებლობა ნებართვის გარეშე დაიწყო.

ორგანიზაციაში ამბობენ, რომ ახალციხის მერიას კანონდარღვევის შესახებ ორჯერ მიმართეს და უწყებამ მიქელაძეს ნებართვა ამის შემდეგ მისცა, თუმცა ამ დროისთვის ბენზინგასამართი სადგური უკვე აშენებული იყო.

გარდა უნებართვოდ დაწყებული მშენებლობისა, ავტოგასამართი სადგური ფარავს როგორც სახელმწიფო საკუთრებაში არსებულ არასასოფლო-სამეურნეო მიწის ნაკვეთებს, ასევე, მიქელაძის საკუთრებაში არსებულ სხვა ფართს, რომელსაც ყადაღა ადევს.

[მამუკა მიქელაძე] ახალციხეში თამარაშვილის N57-ის მიმდებარედ, ცენტრალური მაგისტრალის გასწვრივ, ბენზინგასამართ სადგურს აშენებს. ამისთვის მან, 2019 წლის 4 ოქტომბერს შპს "ატლანტ ოილი" დააფუძნა. კომპანიის დირექტორი თავადაა, 50% წილს კი ახალციხელ ბიზნესმენ იმედა მუმლაძესთან იყოფს. 30 ოქტომბერს, ახლად დაფუძნებული შპს-ს დირექტორმა ახალციხის მერიას თამარაშვილის N57-ის მიმდებარედ, მისივე საკუთრებაში არსებულ არასასოფლო სამეურნეო დანიშნულების 35 კვ.მ. მიწის ნაკვეთზე ბენზინგასამართი სადგურის მშენებლობის ნებართვისთვის მიმართა. თუმცა, მშენებლობა მანამდე დაიწყო, ვიდრე ნებართვას მიიღებდა.

საერთაშორისო გამჭვირვალობა — საქართველო

ორგანიზაციის განცხადებით, დარღვევების შესახებ ახალციხის მერია ინფორმირებულია და ამტკიცებს, რომ საკითხს სწავლობს, თუმცა მათი მხრიდან გატარებული ღონისძიებების შესახებ ამ დრომდე უცნობია.

"გაცემულ სამშენებლო ნებართვაზე ზედამხედველობა მერიას არ განუხორციელებია. საზღვრების დარღვევის შესახებ როგორც მუნიციპალიტეტის აღმასრულებელმა ორგანომ, ასევე, სახელმწიფო ქონების ეროვნულმა სააგენტომ ჩვენგან შეიტყო. სააგენტომ დარღვევა დაადასტურა და რეაგირებისთვის ის ახალციხის მერიას 2020 წლის 18 თებერვლამდე გადაუგზავნა. თუმცა, ამ დრომდე არაა ცნობილი, გატარდა თუ არა შესაბამისი ღონისძიებები ქალაქში ავტოგასამართი სადგურის კანონდარღვევებით მშენებლობაზე", — აღნიშნავენ TI-ში.

ორგანიზაცია მიუთითებს მამუკა მიქელაძის სხვა კანონდარღვევაზეც, რომელზე, მათი ინფორმაციით, შესაბამისი უწყებების მხრიდან რეაგირება იგვიანებს. საუბარია ინტერესთა კონფლიქტზე, როცა მიქელაძე საკრებულოში საკუთრების უფლების აღიარების კომისიას ხელმძღვანელობდა და საკუთარ თავს მიწის ნაკვეთი დაუკანონა.

"მამუკა მიქელაძეს, ქალაქ ახალციხის საკრებულოში ფრაქცია ქართული ოცნების თავმჯდომარეობის პარალელურად, 2016 წლის ივლის-აგვისტოში, საკრებულოს ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთზე, საკუთრების უფლების აღიარების კომისიასაც ხელმძღვანელობდა. სწორედ ამ პერიოდში დაუკანონა მან საკუთარ თავს ახალციხეში, თამარაშვილის N57-ის მიმდებარედ არასასოფლო სამეურნეო დანიშნულების 275 კვ.მ. მიწის ნაკვეთი. მიქელაძე თავად იყო განმცხადებელიც და რეზოლუციის დამდებიც", — აღნიშნავენ ორგანიზაციაში.

სწორედ ამის გამო ადევს ყადაღა მიქელაძის მიწის ნაკვეთს, რომელზეც მან მშენებლობა უკანონოდ დაიწყო. საერთაშორისო გამჭვირვალობა — საქართველოში ამბობენ, რომ ფინანსთა სამინისტროს საგამოძიებო სამსახურმა ფაქტზე გამოძიება მხოლოდ წელიწადნახევრის შემდეგ დაიწყო. ყოფილ მაღალჩინოსან სამსახურეობრივი მდგომარეობის გამოყენებით მითვისებას ან გაფლანგვას ედავებიან.

საერთაშორისო გამჭვირვალობა — საქართველო მოუწოდებს ახალციხის მერიას შეისწავლოს ავტოგასამართი სადგურის კანონდარღვევით მშენებლობის საკითხები და გაატაროს შესაბამისი ღონისძიებები. გარდა ამისა, ორგანიზაცია მიმართავს სახელმწიფო უსაფრთხოების სამსახურს, გამოარკვიოს, ხომ არ ჰქონდა ადგილი კორუფციულ გარიგებას უკანონო მშენებლობის სანაცვლოდ და იმოქმედოს კანონით განსაზღვრული წესებით.

მამუკა მიქელაძე ქალაქ ახალციხის 2014-2017 წლის მოწვევის საკრებულოში ფრაქცია ქართული ოცნების თავმჯდომარე იყო.