პარლამენტის თავმჯდომარე, არჩილ თალაკვაძე ამბობს, რომ StopCov-ის ფონდის შექმნისას დარწმუნებული იყო, რომ ქურთული ოცნების თავმჯდომარე, ბიძინა ივანიშვილი დიდ შენატანს გააკეთებდა. მისივე მტკიცებით, ივანიშვილმა ქველმოქმედება აფიშირებისა და რეკლამის გარეშე გააკეთა.

"ეს მეტყველებს იმაზე, რომ მისთვის ფილანტროპია და თავის ხალხთან და ქვეყანასთან დგომა, არის მისი ღირებულებითი სისტემის ნაწილი. რა თქმა უნდა, გასაკვირი ეს არ იყო. გასაკვირი და უმსგავსო იყო ის თავდასხმები, რომელსაც ჩვენ ორი-სამი კვირის განმავლობაში ოპონენტებისგან ვისმენდით. ისინი ნიშნის მოგებით გვეკითხებონენ, სად არის ახლა ბიძინა ივანიშვილი, როცა ქვეყანას სჭირდება. მე მგონია, მთელმა ქვეყანამ დაინახა, რომ ბიძინა ივანიშვილის მიერ შექმნილმა პოლიტიკურმა გუნდმა გასწია ძალიან ეფექტური მენეჯმენტი", — განაცხადა პარლამენტის თავმჯდომარემ იმედის ეთერში.

პარტია ქართულმა ოცნებამ დაადასტურა, რომ გუშინ, 8 აპრილს გავრცელებული ინფორმაცია იმის შესახებ, რომ StopCov ფონდში 100 მილიონი მათმა თავმჯდომარემ და მისმა ოჯახმა გადარიცხა.

"სპეციალურად StopCoV ფონდისთვის 100 მილიონი ლარი ბიძინა ივანიშვილმა ქართუ ფონდში რამდენიმე დღის წინ ჩარიცხა.

ბიძინა ივანიშვილის ოჯახის დონაცია კორონავირუსთან ბრძოლის ფონდის ანგარიშზე გუშინ გვიან ღამით აისახა", — წერია პარტიის განცხადებაში.

13 მარტს ფონდმა ქართუმ გაავრცელა განცხადება, რომ კორონავირუსის გავრცელებასთან ბრძოლაში მზადაა, საჭიროებისა და დანაკლისის შემთხვევაში სახელმწიფოს ფინანსურად დაეხმაროს. ფონდის განცხადება მმართველმა პარტიამ, ქართულმა ოცნებამ გაავრცელა:

"ქართუ ფონდი, თავის მხრივ, გამოთქვამს მზადყოფნას საჭიროების, ნებისმიერი შესაძლო ფინანსური თუ სხვა სახის დანაკლისის შემთხვევაში, საკუთარი სახსრებით შეავსოს ეს დანაკლისი და სახელმწიფოს გამოუყოს იმ მოცულობის ფინანსური რესურსი, რაც საჭირო იქნება ვირუსის გავრცელების საფრთხისგან საზოგადოების მაქსიმალურად დასაცავად".

StopCov ფონდი მთავრობის ინიციატივით შეიქმნა და შეგროვებული თანხა კორონავირუსის წინააღმდეგ საბრძოლველად უნდა დაიხარჯოს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: