ალბათ, აქამდეც გსმენიათ ცოდნის კაფესა და მისი დაუღალავი თანადამფუძნებლის, ნანა ბაგალიშვილის შესახებ, რომელიც გამუდმებით ახალ-ახალ სოციალურ პროექტშია ჩართული, იმისთვის, რომ მოქალაქეებს მძიმე ცხოვრება შეუმსუბუქოს.

ორგანიზაცია ცოდნის კაფე თანხას შემოწირულობებით აგროვებს და ამის შემდეგ ხანდაზმულებს ეხმარება. წლებია, რაც ბენეფიციარების მნიშვნელოვან ნაწილში ახალგაზრდებთან ერთად მოხუცებიც არიან. სწორედ მათ შეეხოთ კორონავირუსი ყველაზე მძიმედ — მოწყვლად, მაღალი რისკის ჯგუფში შედიან და საგანგებო მდგომარეობის პირობებში, გარეთ გასვლა ეკრძალებათ, თუ სახლთან ახლო მდებარე მაღაზიაში ან აფთიაქში არ მიდიან.

პანდემიის პირობებში მოხუცების მდგომარეობასა და ყოველდღიურობაზე ნანა ბაგალიშვილი გვესაუბრა:

"მარტოხელა ხანდაზმულებს სოციალური დისტანცია სოციალურ იზოლაციად ექცათ და განსაკუთრებულადაც შეშინდნენ. მათი ნუგეში და მხარდაჭერა გვინდა სიღნაღის მუნიციპალიტეტის 11 სოფელში".

ზოგიერთ მოხუცს საკვების პრობლემა აქვს, რადგან პენსიების ნაწილი წინსწრებით გამოიტანეს. საზოგადოებრივი დონაციებით ცოდნის კაფე მათ სხვადასხვა პროდუქტს უსასყიდლოდ გადასცემს.

"ზოგს საკვები აქვს, მაგრამ აქვს დეპრესია, ფსიქიკური ჯანმრთელობა კი — გაუარესებული. ასეთებთან მიგვაქვს ყვავილები დიდი ქოთნით, ზრუნვის ინსტრუქცია და სადეზინფექციო სითხე.

ფქვილი უფასოდ უნდა მივიტანოთ 100 ხანდაზმულს, თითოს ათი კილო, ჯამში — 1 000 კილო".

სწორედ ამ მიზნით, ნანა წნორელ მეწარმეს, ავთო ტუხაშვილს დაუკავშირდა და ხანდაზმულებისთვის 500 კილოგრამი ფქვილის ყიდვაზე შეუთანხმდა, თუმცა მოხუცებისთვის განკუთვნილი ფქვილი ავთომ ცოდნის კაფეს უსასყიდლოდ გადასცა.

როგორც ნანა გვიყვება, ავთო ტუხაშვილს ქიზიყში წისქვილი აქვს:

"იმდენს აკეთებს, დიდ კომპანიების შეუძლია შეეჯიბროს სოციალურ პასუხისმგებლობაში".

ის ცოდნის კაფეს მხარდამჭერი და სოფელ ერისიმედის ბიბლიოთეკის ერთ-ერთი შემქმნელია.

"საზღვრისპირა სოფელ ერისიმედში 81 ოჯახს მიუტანა ფქვილი და საკვები. ამასთან ერთად, ხანდაზმულებსა და მარტოხელებს 1 ტონა ფქვილს ჩუქნის. არ არის მხოლოდ პირად კეთილდღეობაზე ორიენტირებული. ევროპული ღირებულებებით, განათლების მხარდამჭერი, სულ სიახლეებს ეძებს და სიკეთეს სულ ჩუმად და მოკრძალებით აკეთებს. ყველაზე ლამაზი ეზო აქვს მთელს ქიზიყში", — აღტაცებით გვიყვება ნანა.

თუმცა, არანაკლებ აღმაფრთოვანებელია ის ინიციატივა, რომელსაც თავად ნანა ცოდნის კაფეს საშუალებით ახორციელებს.

ახალ ინიციატივას მოხალისე შვილიშვილების პროგრამა ჰქვია — იმ მოხუცებს, რომლებსაც დარეკვა, მოკითხვა და გამხნევება სჭირდება, მოხალისე შვილიშვილები დაურეკავენ.

ერთ-ერთია 65 წლის ქალი, რომელიც 4 წელია, რაც ძალადობას გამოექცა და ახლა მარტო ცხოვრობს. ღირსეული პირობების შექმნაში მას უცნობები ცოდნის კაფეს საშუალებით ეხმარებიან.

72 წლის ქალს კი ყოველდღიურად 19 კიბის ავლა-ჩავლა უწევს იმისთვის, რომ სახლში 5 ლიტრი წყალი მიიტანოს:

"მარტოკინა ვარ. სულ შიში მეუფლება, ვფიქრობ, მარტო რომ ვარ და ღამდება, ნეტა როდის გათენდება".

ცოდნის კაფეს საშუალებით, 162-მა მოქალაქემ 3 დღეში 4 930 ლარი შეაგროვა. თუმცა, ეს ყველაფერი არაა — როგორც ნანამ სტატიაზე მუშაობის პროცესში გვამცნო, გიორგეთელში მცხოვრებმა ფერმერმა, შორენა ლობჟანიძემ, ხანდაზმულების დასახმარებლად 50 კილოგრამი კარტოფილი უფასოდ გადასცა.

ნანა ბაგალაშვილი და ავთო ტუხაშვილი კვლავ აგრძელებენ შეუმჩნევლად სიკეთის კეთებას. ამჯერად დახმარებას 58 ხანდაზმული ელოდება. ამ სიტუაციაში ერთმანეთის მიმართ თანადგომისა და მზრუნველობის გამოხატვა კი ყველაზე მნიშვნელოვანი რამაა, რაც შეგვიძლია გავაკეთოთ.

ცოდნის კაფეს გუნდს COVID 19-ს შედეგად შექმნილ მდგომარეობაში ხანდაზმულთა საჭიროებების კვლევასა და საპასუხო ნაბიჯების გადადგმაში მხარს უჭერს USAID-ს პროგრამა ACCESS.