სოფლის მეურნეობის მინისტრის, ლევან დავითაშვილის თქმით, საგანგებო მდგომარეობაში ყველა საგანგებოდ მუშაობს და სახელმწიფო ბიზნესთან კატეგორიული იქნება. მან აღნიშნა, რომ სამინისტრო სხვადასხვა უწყებებთან ერთად მუდმივ კოორდინაციაშია ამ სექტორთან. ამ თემაზე მინისტრმა მთავრობის ბრიფინგზე ისაუბრა.

"ჩვენ ვიქნებით კატეგორიულები, მომთხოვნები ვიქნებით ბიზნესთან, ჩვენ შეგვიძლია წარმოვიდგინოთ, რომ ამის უფლებაც გვაქვს ეს არის საგანგებო მდგომარეობა და საგანგებო მდგომარეობაში ყველამ საგანგებოდ უნდა ვიმუშაოთ თუმცა ჩემი სურვილი არაა, რომ საგანგებო ნაბიჯების გადადგმა მოგვიწიოს, ბევრი ბიზნესი ამას პასუხისმგებლობით უდგება", — თქვა ლევან დავითაშვილმა.

დავითაშვილის განცხადებით, მნიშვნელოვანია მოსახლეობის პროდუქტებით უზრუნველყოფის პრობლემა არ შეექმენას. მინისტრმა აღნიშნა, რომ მთავრობამ შეიძლება გადახედოს იმ პროდუქტების სიას, რომელთა კომპენსირებაც ხდება, თუმცა ყველას უნდა ახსოვდეს, რომ რესურსი შეზღუდულია. მისი თქმით, საგანგებო მდგომარეობის პირობებში მნიშვნელოვანია, რომ შემოსავალი მაღალი პასუხისმგებლობით გადანაწილდეს.