დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ცხოველები, მათ შორის შინაური თუ ქუჩაში მცხოვრები ძაღლები და კატები, კორონავირუსის გავრცელების საფრთხეს ჯერჯერობით არ წარმოადგენენ და მათი მიტოვება მიუღებელია. ამ თემაზე დღეს, 6 აპრილს ბიოლოგმა ლევან ბუთხუზმა, საქართველოს წვრილი ცხოველების ვეტერინართა ასოციაციის პრეზიდენტმა მარიამ ჩხიკვიშვილმა და ვეტერინარმა გიორგი მელაშვილმა შეხვედრა გამართეს.

სპეციალისტები ამბობენ, რომ ბოლო დროს გახშირდა მიუსაფარი ცხოველების სასტიკი მოპყრობისა და შინაური ცხოველების მიტოვების ფაქტები. მარიამ ჩხიკვაძე აღნიშნავს, რომ შეხვედრის მთავარი მიზანი ადამიანებისთვის სწორი ინფორმაციის მიწოდება იყო, რადგან ვეფხვის ინფიცირებაზე და ზოგადად უხანში კატების ინფიცირებაზე არასრულყოფილი ცნობები ვრცელდება.

"ცხოველებს პირველადი ტესტირებით დაუდგინათ მხოლოდ ვირუსის მატარებლობა, მაგრამ ეს არ ნიშნავს, რომ მათ დაავადება ამ ფორმით უვლინდებათ, ამის თქმა შესაძლებელი იქნება მხოლოდ ანტისხეულების აღმოჩენის შემდეგ მათ ორგანიზმში", — ამბობს მარიამ ჩხიკვაძე.

მისი თქმით, მეცნიერებს დრო დასჭირდებათ იმის გამოსაკვლევად გადადის თუ არა ცხოველიდან ადამიანზე დაავადება. ლევან ბუთხუზის აზრით, შინაური ცხოველები ადამიანებს პრობლემას არ შეუქმნიან. ამ თემაზე მან TV პირველის ეთერში ისაუბრა.

"ვრცელდება ინფორმაცია იმის შესახებ, რომ შინაური ცხოველებიდან გადმოდის ვირუსი ადამიანებზე და პირიქით. მსოფლიო ჯანდაცვის ორგანიზაციის მიერ დღემდე არ დასტურდება მსგავსი რამ, შინაური ცხოველები არ წარმოადგენენ მათი დღევანდელი მდგომარეობით საშიშროებას და სოციალური პასუხისმგებლობა ითხოვს, რომ ჩვენ ჩვენი შინაური ცხოველები გვყავდეს ჩვენთან და არ გავუშვათ ქუჩაში, მიუხედავად იმისა ეს შეტყობინება მართალი იქნება მომავალში თუ არა", — ამბობს ლევან ბუთხუზი.

მიკრობიოლოგ გიორგი მელაშვილის თქმით, კორონავირუსის ჯგუფი ერთმანეთთან ჯვარედინი რეაქტიულობით ხასიათდება, რაც ნიშნავს იმას, რომ შეიძლება ცხოველს ერთი კორონავირუსი გქონდეს, მაგრამ ანალიზით დადგინდეს, რომ ეს სხვა ვირუსია. მისი თქმით, მიუღებელია ადამიანებმა ცხოველები ქუჩაში გააგდონ და მათ სასტიკად მოექცნენ.