გურჯაანელი კაკო ჯეირანაშვილის 1 500 ტიტა მოქალაქეებმა მადლიერების ნიშნად თბილისის სხვადასხვა საავადმყოფოს ექიმებს აჩუქეს. წითელ ტიტებს თან ჰქონდათ ბარათები წარწერებით: "გვეამაყებით, ჯანმრთელობას გისურვებთ!"; "ჩვენი სიცოცხლე თქვენს ხელშია, გვეამაყებით, მადლობა!"

იდეის ერთ-ერთი ავტორი, სოფო ახალაია On.ge-სთან საუბარში აღნიშნავს, მეგობრებმა ტიტების შეძენა მას შემდეგ გადაწყვიტეს, რაც კაკო ჯეირანაშვილის შესახებ ფეისბუქზე ინფორმაცია გავრცელდა. მათ საერთო ჯგუფი გააკეთეს, ფული შეაგროვეს და ნაყიდი ტიტები თბილისში სხვადასხვა საავადმყოფოს ექიმებს აჩუქეს.

"ჩვენი მთავარი მიზანი იყო დავხმარებოდით კაცს, რომელმაც იშრომა, რომ კვლავ ჰქონდეს იმის სურვილი განაგრძოს ბევრი ლამაზი ყვავილის დათესვა. თითოეული ადამიანის შრომა ჩვენთვის ძვირფასია. ასევე შეუფასებელია იმ მედპერსონალის შრომა, რომელიც ჩვენთვის სიცოცხლეს რისკავს. ეს იყო მიზეზი, დაგვენახებინა ადამიანებისთვის რომ ერთად დგომით ყველაფერს შევძლებთ", — ამბობს სოფო ახალაია.

ფოტო: ინფექციური საავადმყოფო

ფოტო: ინფექციური საავადმყოფო

ფოტო: ინფექციური საავადმყოფო

ფოტო: ინფექციური საავადმყოფო

გურჯაანელი კაკო ჯეირანაშვილის ისტორია, რომელიც პანდემიის გამო ტიტებს ვეღარ ყიდდა, რამდენიმე დღის წინ გავრცელდა. რადიო თავისუფლებასთან საუბარში 63 წლის მეყვავილე ამბობდა, რომ ამ სეზონზე დაახლოებით 2 000 ლარი დაკარგა, მისი 5 000 ტიტა კი ისევ ნაკვეთშია და ჭკნება.

კაკო ჯეირანაშვილის დახმარების სურვილი ძალიან ბევრმა ადამიანმა გამოთქვა. ინფორმაციის გავრცელებიდან, მეორე დღესვე On.ge-სთან საუბრისას კაკო ჯეირანაშვილის შვილმა აღნიშნა, რომ წარმატებული სეზონის შემთხვევაში მიღებული თანხა შეგროვებული იყო. მისი თქმით, მამა აღარ ნერვიულობს და გახარებულია.