ფეისბუქმა გადაწყვიტა, რომ მედიის განვითარება $100 მილიონით დააფინანსოს, რადგან "კორონავირუსის პანდემიის დროს ამბების დროული და სანდო გაშუქება ისეთი მნიშვნელოვანია, როგორც არასდროს". $25 მილიონი გრანტებს მოხმარდება, რათა ლოკალური ახალი ამბები დაფინანსდეს, დანარჩენი $75 მილიონი კი მსოფლიო მედიაორგანიზაციებს დამატებით მარკეტინგულ ბიუჯეტად გადაეცემათ.

მედიაორგანიზაციები ეკონომიკურმა კრიზისმა მნიშვნელოვნად დააზარალა. შემცირდა სარეკლამო დანახარჯები და კომპანიებმა მარკეტინგულ აქტივობებზე უარი თქვეს. არადა იმ პირობებში, როცა კორონავირუსის შესახებ დეზინფორმაცია საოცარი სისწრაფით ვრცელდება, მაღალი ხარისხის ჟურნალისტიკა ასეთი მნიშვნელოვანი არასდროს ყოფილა.

"თუ ადამიანებს სჭირდებოდათ არგუმენტი, რომ ჟურნალისტიკა შეუცვლელი საზოგადოებრივი სიკეთეა, ახლა სწორი დროა ამაში დასარწმუნებლად", - ნათქვამია ფეისბუქის პრესრელიზში. კომპანიამ ასევე დადო პირობა, რომ მთელი ძალით შეებრძოლება პლატფორმაზე გავრცელებულ ყალბ სიახლეებს.

ფეისბუქი აპირებს, რომ იმ ქვეყნების მედიაორგანიზაციებზე კონცენტრირდეს, რომელთაც კრიზისი ყველაზე მეტად შეეხოთ. 2019 წელს ტექ-გიგანტმა განაცხადა, რომ კონტენტისა და საინფორმაციო პროგრამების განვითარებაში მომდევნო სამი წლის განმავლობაში $300 მილიონს დახარჯავდა. კორონავირუსის ფონზე კი გამოყოფილ თანხას კიდევ $100 მილიონი დაემატება. ფეისბუქი ასევე აპირებს, მსოფლიოს სხვადასხვა ქვეყანაში არსებულ მედიაორგანიზაციებს კონტენტის მონეტიზაციაში დაეხმაროს.

კომპანია აცხადებს, რომ პანდემიის დროს მესენჯერისა და ვიდეოზარების გამოყენება გაიზარდა, თუმცა ბიზნესები ნაკლებ ფულს ხარჯავენ ფეისბუქზე რეკლამებაში.

"შექმნილი სიტუაცია ჩვენც ისევე შეგვეხო, როგორც უამრავ სხვა კომპანიას", - ნათქვამია ბლოგზე გამოქვეყნებულ ჩანაწერში.