სმარტფონები ყოველდღიური მოხმარების ნივთებად იქცა და მათ გარეშე ცხოვრება თითქმის წარმოუდგენელია. მათი მთელი ხიბლი მრავალფუნქციონალურობასა და მოსახერხებულობაშია. სმარტფონი საშუალებას გაძლევთ, საკუთარი შეხედულებისამებრ დააკომპლექტოთ მისი მეხსიერება. არსებობს ძირითადი აპლიკაციები, რომელთაც მომხმარებლების უმრავლესობა უკვე იყენებს, თუმცა ქვემოთ ჩამოთვლილი სასარგებლო აპლიკაციებიდან ზოგიერთს შეიძლება არ იცნობდეთ.

ფოტო: GaudiLab / Shutterstock

თუ გიყვართ მუსიკა, კითხვა ან მოგზაურობა, აუცილებლად განაგრძეთ კითხვა, რადგან ეს ის აპლიკაციებია, რომელთა გამოყენებაც ცხოვრებას გაგიმარტივებთ.

PlayTube

Playtube-ის გადმოწერის შემთხვევაში თქვენ შეძლებთ მოუსმინოთ სასურველ სიმღერებს მაშინაც კი, როცა ინტერნეტთან წვდომა არ გექნებათ. აპლიკაცია სიმღერას პირველად მოსმენისთანავე ,,აკეშირებს" და ყოველ ახალ მოსმენაზე ახლიდან ჩამოტვირთვა და თქვენი მეგაბაიტების შეჭმა აღარ სჭირდება.

Shazam

Shazam მსოფლიოში ერთ-ერთი ყველაზე პოპულარული აპლიკაციაა და მას 100 მილიონზე მეტი მომხმარებელი ჰყავს. ხშირად ხდება, რომ ტრანსპორტში ან მაღაზიაში ყურს მოჰკრავთ მელოდიას ან სიმღერას, ძალიან მოგეწონებათ, მაგრამ არ იცით, როგორ მოძებნოთ სიმღერის სახელი ან შემსრულებელი. ამ პრობლემას Shazam-ის ღილაკზე თითის ერთი დაჭერით გამოასწორებთ და ნებისმიერ სიმღერასა თქვენს მუდმივ თანამგზავრად აქცევთ.

თუმცა, iPhone-ის მფლობელებს ეს აპი აღარ სჭირდებათ, Siri-ს უკვე შეუძლია მოისმინოს მელოდია და უპასუხოს კითხვაზე: "what's that song?".

Pic jointer

Pic jointer-ს აპლიკაცია საშუალებას გაძლევთ, მარტივად და სწრაფად დაამუშავოთ ფოტოები, შექმნათ კოლაჟი, შეურჩიოთ ჩარჩო, დაადოთ ფილტრები და ა.შ. Pic jointer ნებისმიერი სელფომანისთვის ნამდვილი მისწრებაა.

Wikipedia mobile

Wikipedia-ს არსებობა ახალი არავისთვის არ არის, ის გვეხმარება გავიგოთ და აღმოვაჩინოთ იმაზე მეტი, ვიდრე ვიცით, გავიღრმავოთ ცოდნა ან გადავამოწმოთ ნებისმიერი ფაქტისა თუ მოვლენის სინამდვილე. თუმცა ცოტა ადამიანმა იცის, რამდენად კომფორტულია ვიკიპედიის აპლიკაცია. მისი დახმარებით არა მხოლოდ კომპიუტერიდან, არამედ მობილურიდანაც გექნებათ წვდომა ზღვა ინფორმაციაზე.

ცხადია, Wikipedia-ზე შესვლა თქვენი სმარტფონის ბრაუზერითაც შეგიძლიათ, მაგრამ ტექსტის კითხვა აპლიკაციაში ბევრად მოსახერხებელია.

Maps me

ეს არის აპლიკაცია, რომელიც ნებისმიერ მოგზაურსა თუ ტურისტს გამოადგება. ის სწრაფად გაწვდით ქალაქებისა თუ სოფლების დეტალურ რუკას, გიჩვენებთ ქუჩების, მაღაზიებისა თუ ისტორიული ღირსშესანიშნაობების ადგილმდებარეობას. Maps me-ს მსოფლიოში 50 მილიონზე მეტი მოგზაური იყენებს. აპლიკაციის პოპულარობა დიდწილად იმით არის განპირობებული, რომ მის გამოსაყენებლად ინტერნეტის ქონა აუცილებელი არაა.