ჩინეთის ჯანდაცვის სფეროს წარმომადგენლების თქმით, მედიკამენტი, რომელსაც იაპონაიაში გრიპის ახალი შტამების წინააღმდეგ იყენებდნენ, კორონავირუსით დაინფიცირებულ პაციენტებში ეფექტიანი აღმოჩნდა. ამის შესახებ იაპონურმა მედიასაშუალებებმა ოთხშაბათს განაცხადა.

ჟან ქსინმინმა, ჩინეთის მეცნიერებისა და ტექნოლოგიების სამინისტროს ოფიციალურმა წარმომადგენელმა განაცხადა, რომ ფავიპირავირმა, Fujifilm-ის შვილობილი კომპანიის მიერ შექმნილმა მედიკამენტმა უხანსა და შენჟენში ჩატარებული კლინიკური ცდებისას დამაიმედებელი შედეგები აჩვენა. ცდებში 340 პაციენტი მონაწილეობდა.

"მედიკამენტს უსაფრთხოების მაღალი ხარისხი გააჩნია და იგი მკურნალობისთვის საკმაოდ ეფექტიანია", — თქვა ჟანმა.

შენჟენში პაციენტებმა, რომლებსაც მედიკამენტით უმკურნალეს, ვირუსისადმი უარყოფითი შედეგი საშუალოდ ოთხ დღეში აჩვენეს, ხოლო იმათმა, ვისაც მედიკამენტი არ მიუღია, იმავე შედეგი საშუალოდ 11 დღეში მიიღეს.

ასევე, რენტგენმა აჩვენა, რომ პაციენტების 91%-ს, რომლებმაც მედიკამენტი მიიღეს, ფილტვების მდგომარეობა გაუუმჯობესდა.

Fujifilm Toyama Chemical-მა, რომელმაც მედიკამენტი 2014 წელს შექმნა, კომენტარის გაკეთებაზე უარი განაცხადა.

მედიკამენტს ასევე, კლინიკური ცდებისთვის იაპონელი ექიმებიც იყენებენ. ისინი წამალს დაინფიცირებულ პაციენტებზე ზომიერად ცდიან, რათა სიმპტომები აკონტროლონ და ვირუსს გამრავლებაში ხელი შეუშალონ.

თუმცა, იაპონიის ჯანდაცვის მინისტრმა განაცხადა, რომ მედიკამენტი შედარებით მძიმე შემთხვევების დროს ნაკლებად ეფექტიანია.

"ჩვენ წამალი დაახლოებით 80 ადამიანს მივეცით, თუმცა შედეგები დამაიმედებლად არ გამოიყურება. როგორც ჩანს, ორგანიზმში უკვე გამრავლებულ ვირუსს მედიკამენტი ვეღარ ერევა", — თქვა მან.

2016 წელს იაპონიის მთავრობამ მედიკამენტი გვინეაში გავრცელებული ებოლას ვირუსის წინააღმდეგ გადაუდებელი დახმარებისთვის მოიმარაგა.

ფავიპირავირის COVID-19-ის წინააღმდეგ გამოსაყენებლად სახელმწიფოს თანხმობაა საჭირო. ჯანდაცვის წარმომადგენლებმა განაცხადეს, რომ მედიკამენტი მთავრობის მიერ, სავარაუდოდ, მაისში დამტკიცდება, მაგრამ კლინიკური ცდების გადადების შემთხვევაში, ეს პროცესიც გაჭიანურდება.