კორონავირუსის მომატებული გავრცელების გამო ჰარვარდი ონლაინლექციებზე გადადის და სტუდენტებს მოუწოდებს, რომ გაზაფხულის არდადეგებიდან აღარ დაბრუნდნენ და საერთო საცხოვრებლები ხუთ დღეში დაცალონ.

უნივერსიტეტის პრესმდივნის ჯეისონ ნიუტონის თქმით, 23 მარტის შემდეგ ყველა შეხვედრა ვირტუალურად ჩატარდება.

ის სტუდენტები, რომლებისთვისაც აუცილებელია საუნივერსიტეტო ქალაქში ყოფნა, ლექციებს დისტანციურად დაესწრებიან და მკაცრად განსაზღვრულ წესებს დაემორჩილონ.

"ვიცი, რომ ჩვენს სტუდენტებს გაუჭირდებათ საკუთარი მეგობრებისა და საკლასო ოთახების დატოვება. ჩვენ ამას ვაკეთებთ არა მხოლოდ თქვენს დასაცავად, არამედ ჩვენი საზოგადოების სხვა წევრების დასაცავადაც, რომლებიც შესაძლოა ამ დაავადების მიმართ უფრო მეტად მოწყვლადები არიან", — ნათქვამია ჰარვარდის პრეზიდენტის წერილში.

COVID-19-ის გავრცელების გამო დისტანციურ სწავლებაზე გადადის მასაჩუსეტსის ტექნოლოგიის ინსტიტუტიც (MIT). მათ 16 მარტიდან 20 მარტის ჩათვლით ყველა ლექცია გააუქმეს, რასაც საგაზაფხულო არდადეგები მოჰყვება. სასწავლო დაწესებულების განცხადებაში აღნიშნულია, რომ ამ ხნის განმავლობაში პროფესორები ონლაინ გაკკვეთილებისთვის მოემზადებიან, რომელიც 30 მარტს დაიწყება.

ამასთანავე, სტუდენტები საერთო საცხოვრებლებში ვეღარ დაბრუნდებიან და თავიანთი ბინები 17 მარტამდე უნდა დაცალონ.

ბოლო მონაცემებით, ამერიკის შეერთებულ შტატებში კორონავირუსის 1 037 შემთხვევა დაფიქსირდა. ვირუსის გამო 28 ადამიანი გარდაიცვალა, აქედან 23 ვაშინგტონში. გარდა ამისა, 8 ადამიანი გამოჯანმრთელდა. COVID-19-ის გამო კონგრესის სამი წევრი თვითიზოლაციაშია.

მსოფლიო მასშტაბით კორონავირუსის შემთხვევებმა 119 ათასს გადააჭარბა. ყველაზე მეტი შემთხვევაა დაფიქსირებული ჩინეთში (80 956), იტალიაში (10 149), ირანი (8 042), სამხრეთ კორეაში (7 755), საფრანგეთში (1 784), ესპანეთსა (1 695) და გერმანიაში (1 565).

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: