ქუთაისი-სამტრედიის გზაზე მიკროავტობუსი ხიდიდან გადავარდა. შემთხვევა ე.წ. კოპიტნარის ხიდზე მოხდა. ადგილზე საპატრულო და სასწრაფო სამედიცინო დახმარების ეკიპაჟები იყო მობილიზებული.

როგორც On.ge-ს შსს-ში განუცხადეს, მომხდარის შედეგად ერთი პირი დაშავდა. როგორც თვითმხილველები ჟურნალისტებთან საუბრისას აცხადებენ, ავტოსაგზაო შემთხვევის შედეგად მძღოლია დაშავებული, რომელიც საავადმყოფოში გადაიყვანეს.

შსს-ს ცნობით, გამოძიება სისხლის სამართლის კოდექსის 276-ე მუხლის პირველი ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს და ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.