ყოფილი ბრაზილიელი ფორვარდი რონალდინიო პარაგვაიში პოლიციას ქვეყანაში ყალბი პასპორტით შესვლის ბრალდებით ჰყავს დაკავებული. ფეხბურთელი დედაქალაქ ასუნსიონში ძმასთან ერთად იმყოფება.

პოლიციამ ქალაქში მდებარე სასტუმროში მათი სასტუმროს ოთახები გაჩხრიკა. როგორც პარაგვაის შინაგან საქმეთა მინისტრი აცხადებს, ძმები დაპატიმრებულები არ არიან, თუმცა მათზე გამოძიება მიმდინარეობს.

მინისტრი დასძენს, რომ რონალდინიო და მისი ძმა კანონის დარღვევას უარყოფენ და გამოძიებასთან თანამშრომლბენ.

2019 წლის ივლისში, გადასახადების გადაუხდელობის გამო, რონალდინიოს ბრაზილიური და ესპანური პასპორტები გაუუქმეს.

"რონალდინიოს ხვალ დილის 8 საათზე პროკურატურაში დავკითხავთ. პატივს ვცემ მის პოპულარობას სპორტში, მაგრამ კანონს ყველამ უნდა სცეს პატივი. არ აქვს მნიშვნელობა ვინ ხარ, კანონი შენც გეხება", — აცხადებს შს მინისტრი ადგილობრივ მედიასთან.

რონალდინიომ კარიერის განმავლობაში ორჯერ, 2004-2005 წლებში, მოიპოვა მსოფლიოში წლის საუკეთესო მოთამაშის ტიტული. ის ფეხბურთიდან 2018 წელს წავიდა და ახლა საკუთარი წიგნის პოპულარიზაციას ეწევა. ამ მიზნით იმყოფებოდა ის პარაგვაიში.

რონალდინიოს ქონება 90 მილიონ დოლარს აღემატება. ინსტაგრამის ერთ სარეკლამო პოსტში ის 200 000 დოლარამდე იღებს.