პატრიოტთა ალიანსის დეპუტატი ემზარ კვიციანი ისევ იოსებ სტალინს აქებს. პირად ფეისბუქგვერდზე მან გააზიარა შეურაცხმყოფელი პოსტი, რომელშიც წერია, რომ "სტალინს მხოლოდ დეგენერატები ლანძღავენ". პოსტზე კვიციანი წერს: "დიდება დიდ სტალინს".

აქამდე კვიციანი საბჭოთა კავშირის ბელადს "ჩემს სტალინად" მოიხსენიებდა და ამბობდა, რომ მზად არის მის გამო ტანკს შეუვარდეს. მისივე თქმით, სტალინს "ტყუილებს უგონებდნენ", რაც სწყინდა და ყოველთვის შეეცდებოდა "დიდი ბელადის" ინტერესები დაეცვა.

იოსებ სტალინი საბჭოთა კავშირის ერთ-ერთი ყველაზე ცნობილი ლიდერია. მის სახელს უკავშირდება მეორე მსოფლიო ომში ნაცისტური გერმანიის დამარცხება. ასევე, უკრაინელი ხალხის ჰოლოდომორი და ათიათასობით ადამიანის უმიზეზოდ გადასახლება და დახვრეტა, რაც სტალინური რეპრესიებით არის ცნობილი. დაკავებულებსა და მოკლულებს შორის იყვნენ ქართული ინტელიგენციისა და კულტურის სფეროს წარმომადგენლები.