კომუნიკაციების კომისიის განცხადებით, პირველი ივნისიდან მშობლებს შეეძლებათ, რომ საკუთარი შვილები ონლაინსაფრთხეებისგან დაიცვან და ისეთ ვებგვერდებზე შეზღუდონ წვდომა, რომელიც მათთვის საფრთხის შემცველია. კომისიამ დაამტკიცა დებულება, რომლის მიხედვითაც, განისაზღვრა ვალდებულებები, როგორც ინტერნეტპროვაიდერი კომპანიების, ისე ვებ გვერდების მფლობელი კომპანიების მიმართ.

ინტერნეტ პროვაიდერ კომპანიებს დაეკისრათ ვალდებულება შეიმუშაონ ისეთი მექანიზმები, რომლის საფუძველზეც, კონკრეტული აბონენტი მშობლის მოთხოვნით, ვებგვერდებზე წვდომა შეიზღუდება. ამასთანავე, კომპანიებს დაეკისრათ ვალდებულება, რომ საკუთარ ვებგვერდებს მიანიჭონ ასაკობრივი ნიშანდება, კერძოდ, რომელი ასაკობრივი კატეგორიისთვისაა განკუთვნილი მათ ვებგვერდზე განთავსებული აუდიო-ვიზუალური პროდუქცია.

კომუნიკაციების კომისია ბავშვებისთვის საფრთხის შემცველი ინტერნეტ ვებგვერდების სპეციალურ სარეიტინგო სიას შეადგენს და საკუთარ ვებგვერდზე გამოაქვეყნებს. სია კვირაში ერთხელ განახლდება.

გარდა ამისა, კომუნიკაციების კომისია შემთხვევითი შერჩევის პრინციპით მონიტორინგს განახორციელებს, რათა დამატებითი ფილტრი შექმნას და გააკონტროლოს რამდენად ჯეროვნად ასრულებენ კომპანიები საკუთარი ვალდებულებებს.