არასამთავრობო ორგანიზაცია საფარი აცხადებს, რომ პროკურორის გულგრილობის გამო უდანაშაულო ქალი ოთხწლიან სასჯელს იხდის. ორგანიზაცია ითხოვს, რომ არასწორად წარმოებული საქმის გამო პროკურორ ნათია ქომაშვილის პასუხისმგებლობის საკითხი დადგეს.

4 მარტის პრესკონფერენციაზე ორგანიზაციის ხელმძღვანელმა, ბაია პატარაიამ განაცხადა, რომ ქალი შვილებზე ძალადობაშია ბრალდებული და ორი წელია სასჯელს იხდის, თუმცა მისი უდანაშაულობის შესახებ არაერთი მტკიცებულება არსებობს. მისივე თქმით, პროკურორმა არასწორად აწარმოა საქმე, რის გამოც არასწორი განაჩენი დადგა.

ბაია პატარაიას განმარტებით, ქალი და მისი შვილები ქმრის ძალადობის მსხვერპლი იყვნენ. მისივე თქმით, ერთმა ექსპერტიზამ დაადგინა, რომ დედა ბავშვებზე არ ძალადობდა, ხოლო მეორე ექსპერტიზამ, ბავშვებზე მამის მხრიდან ძალადობა დაადასტურა. ამავე დროს, პატარაია ამბობს, რომ ბავშვებმა დედის წინააღმდეგ ჩვენება მამის ზეწოლის შედეგად მისცეს.

საფარში აცხადებენ, რომ მათი ჩართულობის შემდეგ ქმარი ცოლზე ძალადობის ბრალდებით პასუხისგებაშია მიცემული, ხოლო არასრულწლოვნებზე მიმართ ძალადობის საქმე ჭიანურდება.

"ჩვენი აზრით იმიტომ ჭიანურდება მეორე საქმე, რომ პროკურატურა ცდილობს თავისი თანამშრომელი, ნათია ქომაშვილი დაიცვას და მას დააფაროს ხელი. ამიტომ ჩვენ იძულებული ვართ, გავასაჯაროოთ ეს საქმე", — განაცხადა ბაია პატარაიამ პრესკონფერენციაზე.

მისივე თქმით, პროკურატურა მესამე ექსპერტიზის ჩატარებას ითხოვს, თუმცა მათ მიაჩნიათ, რომ ეს არასრულწლოვნებისთვის სტრესული იქნება:

"ჩვენ მოვახერხეთ და ბავშვები გადავიყვანეთ მზრუნველობაში და იმ ოჯახში, სადაც ბავშვები ჩამოშორებული იყვნენ ორივე მხარეს, დაიწყეს საუბარი, თუ რა მდგომარეობაში აგდებდა მამა".

ბაია პატარაია ამბობს, რომ გამოძიებას ორი ექსპერტიზა საკმარის მტკიცებულებად არ მიაჩნია და ამ დრომდე ბავშვებისთვის დაზარალებულის სტატუსის მინიჭებას ითხოვს.