ცინცინატში მდებარე ეკლესიამ, ათასობით ოჯახი ძალიან გაახარა. კვირის წირვაზე ეკლესიის წარმომადგენლებმა განაცხადეს, რომ ათასობით ოჯახს სამედიცინო ხარჯებს მთლიანად დაუფინანსებდნენ.

ოჰაიოში ეკლესიის შემოწირულობით ჯამში 41 233 ოჯახმა ისარგებლა, თუმცა, ეკლესიას არც სხვა შტატის მაცხოვრებლები დარჩენია უყურადღებოდ. მაგალითად, კენტუკიში მცხოვრებ 2 974 და ტენესის 503 ოჯახს, ჯამში 1,5 მილიონი დოლარის სამედიცინო ხარჯები დაუფარეს. დაახლოებით 200 000 დოლარის ოდენობის შემოწირულობა ინდიანაში მცხოვრებ 136 ოჯახს ერგო.

ბაპტისტური ეკლესიის წინამძღოლმა საკვირაო წირვაზე საზოგადოების დახმარების მნიშვნელობაზე იქადაგა და მრევლს შემოწირულობისკენ მოუწოდა. გაცემული თანხა მრევლისგანაა გაღებული, რაც ძირითადად ეკლესიის საჭიროებებს ხმარდება ხოლმე.

შემოწირულობით, დაახლოებით, 46,5 მილიონი დოლარის სამედიცინო ხარჯების განულება მოხერხდა.

შემოწირულობის გასაკეთებლად, ეკლესიამ არასამთავრობო ორგანიზაციას, სახელად დავემშვიდობოთ სამედიცინო ხარჯებს (RIP Medical Bills), მიმართა.

ორგანიზაციის მიხედვით, ყოველი 100 დოლარის შემოწირულობაზე 10 ათასი დოლარის ოდენობის სამედიცინო ხარჯების განულება ხდება. დაფარული ხარჯების შესახებ იღბლიანმა მომხმარებლებმა ელექტრონული და საფოსტო წერილებიდან შეიტყვეს.