სომხეთში კორნავირუსის პირველი შემთხვევა დაფიქსირდა. რადიო თავისუფლების სომხეთის ბიუროს ინფორმაციით, დაინფიცირებული სომხეთის 29 წლის მოქალაქეა, რომელიც ქვეყანაში 28 თებერვალს ირანიდან შევიდა. ექიმებს მან თავისით მიმართა.

სომხეთის პრემიერ-მინისტრის, ნიკოლ პაშინიანის განცხადებით, დაინფიცირებულმა კაცმა თეირანიდან ცოლთან ერთად იფრინა, რომელსაც კორონავირუსი არ დაუდგინდა.

"ის ადამიანები, რომელთაც პაციენტთან კონტაქტი ჰქონდათ, იზოლირებულები იქნებიან. თვითმფრინავში, რომელიც თეირანიდან დაბრუნდა, სომხეთის მოქალაქეები იყვნენ. ყველა მგზავრს ნიღაბი ეკეთა და თვითმფრინავიდან აეროპორტამდე ისინი სპეციალური წესით გააცილეს, რათა ზედმეტი კონტაქტი თავიდან აგვერიდებინა. დავადგინეთ ის მესაზღვრეც, რომელმაც პაციენტსა და მის ცოლს საბუთები შეუმოწმა".

პაშინიანის თქმითვე, იმ ტაქსის მძღოლები, რომლითაც პაციენტმა აეროპორტიდან სახლამდე შემდეგ კი საავადმყოფომდე იმგზავრა, გამოვლინდებიან და იზოლირებული იქნებიან.