მმართველი გუნდის დეპუტატი გია ვოლსკი აცხადებს, რომ აშშ-ის ელჩის მოადგილესთან შეხვედრა არაოფიციალური იყო და იქ რაიმე სახის შეთანხმების მისაღწევად არ მისულან, თუმცა ამას ოპოზიციის გამო მაინც ვერ შეძლებდნენ.

"ერთმანეთში ვერ შეთანხმებულან და სადილის პერიოდში რა შეთანხმების მიღწევაზეა საუბარი. აქ ლაპარაკია, რომ გაითავისოს ყველამ, რა სჭირდება მსოფლიოს მოკავშირე საქართველოსაგან", — განაცხადა მან ჟურნალისტებთან.

გუშინ, 25 თებერვალს აშშ-ს ელჩის მოადგილის რეზიდენციაში ოპოზიციის ლიდერების, დიპლომატებისა და ხელისუფლების წარმომადგენლების შეხვედრა გაიმართა. ღონისძიების გამართვის შესახებ მედიისთვის ცნობილი არ იყო.

შენობის დატოვების შემდეგ ოპოზიციონერებმა თქვეს, რომ შეხვედრის ორგანიზატორი აშშ-ს ელჩის მოადგილე იყო. ევროპული საქართველოს ლიდერმა, გიგა ბოკერიამ ჟურნალისტებს უთხრა, რომ ეს იყო "მეგობრული სადილი". დამოუკიდებელი დეპუტატის, თამარ ჩუგოშვილის თქმით კი შეხვედრაზე ზოგადი საკითხები განიხილეს.

რაც შეეხება ოპოზიციის შეთანხმებას, გუშინ, 25 თებერვალს მთავარმა არხმა გაავრცელა ინფორმაცია, რომ ოპოზიცია თბილისის მაჟორიტარების ნაწილი შეარჩია. ალეკო ელისაშვილმა განაცხადა, რომ მათ გუნდთან ეს ფაქტი არავის შეუთანხმებია.

ოპოზიციის ლიდერის დაკავება და შეწყვეტილი დიალოგი

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".