საქართველოს საზოგადოებრივი მაუწყებლის შენობის აშენება, დაახლოებით, 80 მილიონი ლარი დაჯდება. ინფორმაცია ამის შესახებ მშენებლობის ზედამხედველობისთვის გამოცხადებული სატენდერო დოკუმენტებიდან ხდება ცნობილი.

დოკუმენტიდან ირკვევა, რომ თბილისში ანნა პოლიტკოვსკაიას #31-ში საზოგადოებრივი მაუწყებლის ახალი შენობის და დამხმარე შენობა-ნაგებობების სახარჯთაღრიცხვო ღირებულება 77 232 427 ლარია. ამ ნაგებობის მშენებლობის ზედამხედველობისთვის კი 2 988 868 ლარია გათვალისწინებული. ორივე შემთხვევაში თანხა შეიძლება შეიცვალოს და ტენდერის დასრულებისთვის შემცირდეს.

გარდა ამისა, შენობის დიზაინისთვის მაუწყებლის ბიუჯეტიდან 999 999 ლარი დაიხარჯა. მაუწყებელი 2017 წლის პირველ დეკემბერს იუწყებოდა, რომ ახალი შენობა სამ წელში აშენდებოდა. ამ ინფორმაციის გავრცელებიდან ორი წელი და სამი თვე გავიდა, თუმცა მშენებლობა არ დაწყებულა.